Dinna nei lo sorkar?

Mizoram sorkarin stamp duty leh fee dangte a tihpun tihhniam an phut avangin MNF ṭhalaite chuan tun hnai khan Land Revenue & Settlement (LRS) Directorate-a pisa kai turte an dang a; he mi ni vek hian Mizoram sorkarin an thil phut a tihlawhtling a, MNF ṭhalaite pawh an ṭin darh.

MNYF ṭhalaite thil phut hi tun hnai mai, kumin March thlaa Mizoram rorelna in sang ber Assembly house-a pawm tawh a ni a, an hmang ṭan deuh chiah tihah sawiselna lian tak a awm. Eptu party lamin an duh loh thu an sawi fo tawh a, chumi hnuah eptu ṭhalaite'n LRS office an luhchilh a, sorkar pawhin a thu hi a sût leh ta a ni.

Sorkar kal dan hi thlirna chi hnihin a thlir theih awm e. Thlirna pakhat zawkah chuan sorkar fel tak, Assembly House-a rel tawh pawh ni se mipuiin an duh loh a, mipui tana phur rit a nih dawn chuan an thu pawh sût leh mai hreh lo sorkar a ni. Thlirna dang aṭang erawh chuan sorkar lelo tak mai, dinna mumal pawh nei lo, a hma lawka ṭha ti taka rorelna in sang bera an rel tawh pawh ṭhiat leh mai mai ṭhin, a duh apiangin an nawr kal theih sorkar ang mai a ni.

Sorkar hian a thil tih tur hi ngun takin a ngaihtuah lawk ṭhin tur a ni a, Assembly House-a ṭhute ngat phei chu chik takin an zir tur a ni. A hnu lawka tute emaw nawr vanga sut leh mai mai tur thil relna rorel in kan nei a nih chuan a zahthlak hle dawn a, sorkar hi sorkar a nih ngam a ngai a, tute emaw nawr dan apianga awm sorkar a nih chuan sorkar nêp tak ang mai a ni ang.

Eptu MLA parukte pawhin a hnu lawka an duh loh tur thil hi chu a sawina tur Assembly House-ah an duh lohzia au chhuahpui se, rorelna inah hian roreltute hian an rilru pe ve deuh tawh rawh se.

Tun thilah hi chuan sorkar-in stamp duty leh fee dang a tih-punte hi a punna a sang em a, mipui tana phurrit a nih vangin eptu lamin an nawr a, an tihniam ta a, a hriatthiam theih dan a awm a; nimahsela Mizoram rorelna in sang ber a zahawm zel theihna tur leh, awmze neia rorelna kalpui a nih theihna turin sorkar hian dinna mumal tak nei ngam ṭhin rawh se.