Ram venhim leh ram chin humhalh

Home Minister chuan June 3, 2025-a a pisaa MZP Gen. Hqrs hruaitute nen an inkawmnaah, Phuldungsei Thaidawr tlangah Mizoram sorkarin Mizo Indian Reserve (IR) police a dah dawn thu a sawi.

MZP hruaitute sawi danin, Phuldungsei Thaidawr tlang pan chhohna kawng sirah Tripura sorkarin cheng nuai 300 sengin guest house tur an sa mek a, Tripura State Rifles mi leh sate an duty ṭhin. Tripura sorkarin in a sak mek chu tun hnaiah bomb hmanga tihchhiat a ni.

Home Minister-in MZP hruaitute hnena a sawi danin, Thaidawr tlang pan chhohnaah Kawnpui M aṭangin Mizoram IR police dah tum a ni a, hmalak mek a ni. Tripura Tourism Minister hnenah guest house sa chhunzawm tawh lo tur leh Thaidawr tlang tawntirha check gate an siam pawh ṭhiat turin a hrilh bawk.

Thaidawr tlang hi Phuldungsei khaw tàwpa awm a ni a; Phuldungsei khawlaiah kawngpui a kal a, a lehlam chu Mizoram niin, a lehlam chu Tripura a ni thung.

Phuldungsei khaw tàwpa Thaidawr tlang leh a panna lai bâwr velah ramri ṭhenna mumal tak a awm lo nia sawi a ni a; Mizoram chhung a ni tih hi kan ngaihdan a nih rualin, Tripura pawhin an ram chinah an ngai niin a lang a, chuvang chuan kan inchuh ta a ni berin a lang.

Thaidawr tlang hi tun hma aṭang tawhin Mizote awmna hmun, Mizoram chhung a ni. Tripura-in an rawn chuh a, hmalakna lian tham tak an kalpui mek kara Mizoram sorkarin Mizo sipaite dah tuma hma a la hi a lawmawm a; nghak khawmuang loin dah thuai rawh se.

Mizoram sorkar hian Mizoram leh a chhunga chengte himna turin theihtawp chhuah zel se a, Thaidawr lamah chauh ni lo, hmun dang dangah ram humhalh turin chak taka hma a lak a ngai. Mizoram chin humhalh tur hian ram chin hriat chian a pawimawh a, ramri chinah dinna nghet tak neih a ngai bawk ang.

Ram venhim hi sorkarin ngai pawimawh bikah neih a ṭul a, kan ram chin chu na takin humhalh zel se, ṭhenawm state/ram ten an rawn nêk chuan huaisen takin chhang lêt zel rawh se. Sorkarin huaisen taka hma a lak phawt chuan a hnungah Mizo mipui hi nghet takin an ding ngei ang.