Damdawi kaihhnawiha sum hman dan
Aizawl Civil Hospital (ACH) hotute chuan, ACH-a inenkawl MR bill tum zingah kum 2009-2016 chhungin bill dik lo cheng nuai 41 hmuh chhuah a ni a, hengte hi hnâwl a ni. MR bill hi doctor-te'n an countersign ṭhin a, en mumal loh palh, damdawi pawh ni lo, cash memo dik lo thil tel rûk a lo awm ṭhin. Kumin bikah MR bill dik lo hi Rs. 4,00,000 hû hmuhchhuah a ni.
Mizorama sorkar sum kan hmanna tam tak pakhat chu kan damloha kan inenkawlna senso hi a ni. Mizoram chhungah pawh sorkarin thui tak chu a thlawn deuhthawin damlo a enkawl a, Mizoram pawnah damlo na zualte inenkawl turin a tir chhuak bawk. Damlohna leh a kaihhnawiha sorkar insensona hi a tam hle.
Heti chunga mi ṭhenkhatin bill dik lo an thehlut duh hi a demawm hle a, mahni senso pangngai piah lama thil fel lo tih hi mipui lamin bansan a ngai takzet a ni. Hemi piah lamah sorkar doctor-te pawh fimkhur leh fir takin kal zel se, MR bill dik lo heti zat hmuh chhuah a nih chuan hmuh chhuah loha kal liam ta pawh a awm ngei ang tih a chiang a, sorkar sum eirukna tluk hial tho a nih vangin heng mite hi doctor-te hian an man chhuak thei ang.
Damlo inenkawlnaah hian damdawi-in ṭha leh lian zawk pan theih duhthusam a nih rualin intirhchhuah (refer) hi kan awlsam lutuk deuh niin a lang a, a bikin sorkar hnathawk challang deuh chinte’n state pawn an panna khawp natna tam tak hi chu Mizoamah pawh inenkawl theih a ni a, thil an tih theih deuh avanga sorkar sum senga intirh zel hi chu a ṭha lo hle a ni.
Sorkarin damlo a refer-na damdawi-inte pawh hi chhui chian deuh a ṭha a, a hre chiang deuhte sawi hmangin Mizoram sorkara bill leh tur a nih chuan thil ṭul ber ni lo thlenga endika bill tel ṭhin a ni awm a, hei hi a tak a nih chuan a zialo khawp mai. Damdawi-inte pawh hi man tlawm zawka intirh chhuah theih reng, pan ṭhan neih avanga sum senso hautak zawk pawh a awm thei a, inven a ṭha hle.
A ṭul leh mamawh avanga damdawi leh a kaihhnawih thila sorkar sum sen hi a tam tham em avangin, a dik lo leh ṭul loa insenso a nih lohna turin sorkar hian theihtawp chhuah rawh se.