Zirtirtu sem rual ni tawh rawh se

Tunlaiin khaw ṭhenkhatah zirtirtu dah belh phût vang leh zirtirtu sawn chhuah vanga lungawi lohna lantir a awm nual mai. Hetianga zirtirtu sawn leh dah belh phûta sorkar nawrna hi tun hma aṭanga kan hriat reng reng a ni a, tunah pawh lungawi lohna lantir an awm mek.

Zirtirtu chungchanga khawtlangin lungawi lohna an lantir te, sorkar nawr a ngai ṭhinte hi a zialo hle. Zirna leh a kaihhnawih thil hrang hrangah sorkarin ngaihtuahna uluk zawka a hman a, dik tak, ṭha tak leh rualkhai taka hma a lak a ngaihzia tilangtu a ni.

Tun hma aṭanga tun thlengin thingtlang kilkhâwr zawk sorkar sikula zirlai tam zawknaah zirlai zirtirtu an tlem a, an indaih loh em em laiin, khawpui lamah zirtirtu âwl takin an awm nghêk nghûk thung. Hei hi huaisen taka chinfel a ṭul tak zet.

Thingtlang leh hmun kilkhâwr zawk aṭanga Aizawl leh khawpui zawka zirtirtu sawn hi chu an awm fo a, an tam em em zawk a; chutih laiin, khawpui aṭanga thingtlanga sawn erawh an awm tam lo niin a lang.

Mizorama sorkarna chelh mektute hian sorkar sikulah zirtirtu sem rual an tum thu an lo sawi tawh ṭhin a, mipui pawhin anmahniah beiseina sang tak an nei a ni.

Tun sorkar hian thla 18 chhung sorkarna an chelh tawh a; zirtirtu tam em emna khawpui sikul aṭangin zirtirtu indaih lohna thingtlang sikulah zirtirtu a la sawn chhuak mang lo a nih chuan a thil mak tak a ni ang. Khawpui aṭanga thingtlanga a sawn chhuah tawhte pawh a hnu rei lo têah khawpui lama lêt leh nghal mai ṭhin a nih phei chuan a mak lehzual ang.

Tuna a lan danah chuan thingtlanga zirtirtu indaih lohna sikulah thingtlang khaw dang aṭangin zirtirtu an sawn kual mai mai niin a lang a; hetiang zel a nih chuan thingtlang lama zirtirtu indaih lohna hi chinfel a harsa hle ang.

Zirtirtu sem rual a ṭulzia mipuiin an sawi nasa tawh ṭhin a, sorkar hotute pawhin an hre chiang hle; mahse, an sem rual ṭhin tlat si lo hi kan buaina a ni.

Zirtirtu sem rual hi a harsa a ni mai thei a, mahse, thil theih loh erawh a ni lo; sorkar a huaisen a ṭul. Sorkarin huaisen takin zirtirtu a sem rual ngam a ngai a, sorkar hmalakna mipuiin an thlawp ṭhat a ṭul a, zirtirtute pawhin thu an awih a ngai bawk.

Mizoram sorkar hian sorkar sikula zirtirtu sem rual hi huaisen takin kalpui thuai se; transfer & posting rules an buaipui mek nia sawi pawh tipuitlingin hmang thuai teh se.