Kan buaipui leh ngaihven zawng

Aizawl Municipal Corporation (AMC) chuan Aizawl khawpui lûn laia a thlawna hman theih wifi (free wifi) dah turin hma a la mek zel a; free wifi bun tur thlanna atan tender an chhuah hnuah, chhangtu pakhat chiah an awm avangin tender an chhuah nawn leh mek.

AMC inthlan dawn khan tuna AMC enkawltu ni ta MNF hian election manifesto an nei a, chuta inziak tam zawk chu mipui nawlpui hian an hre zui lo a, an thiltih tum zinga ngaihven hlawh zui ta chu free wifi pek an tum thu hi a ni.

Free wifi hi thil ṭangkai tak chu ni thei bawk mah se khawpui hmasawnna hriltu a ni lem lo a, mipuiin heti taka kan ngaihven zui hian kan mizia a tilang chiang awm e. Heng thilte hi chu hmasawnnain a ken tel, sorkar ni kher lo pawhin an pek theih thil a ni a, hmun dangah hetiang tak hian mipuiin an buaipui zui chuk lem lo.

Mizorama thil pawi tak chu mipuiin ram hnuk khawih thil kan tih maite ngaihven lo a, thil dang holam zawk nia ngaih kan buaipui chiam ṭhin hi a ni. Tuna kan state-a sorkar enkawltu Congress ngei pawh hian inthlan dawnah thil tih tum tam tak an nei a, chungte chu an ti zui nge ti zui lo tih pawh kan chhui chiang peih meuh lo a, an intiam angin ram an kaihruai zui nge zui lo tihte pawh kan ngaihven lo.

AMC lamah pawh hian an tih tum zingah free-wifi an pek leh pek loh mai maite kan bawhzui chiam a, an hnathawh dan zawkte hi chhui chiang ila, an tihṭhatah fakin an tih dik tawk lohah khalh ngil turin finchhuah ila a ṭangkai zawk ngei ang.

Politician-te hian mipui ngaih-ven zawng hi an hre chiang a, mipui lawm tur thil apiang hi an bawhzui. Chutiang ti ṭhinte chuan inthlan lehah pawh zuitu an nei ṭha ṭhin tih inhriain mipui lawmna tawk tur an zawng a, ram hmasawnna tak tak aiin mipui tihlawmna tawk thil hi an ngaihven niin a lang.