Sorkar leh a hnathawktute

Chief Minister Lal Than-hawla chuan, tun hnaia doctor-te'n private clinic-ah MRI ti turin an thawn (refer) tih sawiin, Mizoramah sorkarin x-ray, MRI leh CT scan tihna
ṭha a nei lo chu a tlawmngaih thu leh, private clinic-in hmanraw ṭha zawk nei a, sorkar zawkin a nei lo chu tlawmngaihthlak a tih thu a sawi a, "Sorkar hnathawk lian, secretary-te'n ṭan an lak a ṭul a ni," a ti.

Kan ram hotupa ber hian ram tana a ṭhahnemngaihna thu a au chhuahpui rual hian, sorkar hna-thawkte a duhkhawp lohna lam thu hi a au chhuahpui chang a awm ta fo mai. Tun hnaia a thusawi aṭanga a lan dan hi chuan, sorkar-in a neih tur anga a ngaih a neih loh chhan chu a hnathawktu lamin an zir loh vang tia puh theih hial a ni a, hei hi thui dak dik tho mah se a sorkarna vawn fung chelhtu lam pawhin an tih tur an tih bik loh vang a ni tel bawk ang.

Damdawi in bungraw neih ṭhatah hi chuan khawpui dangah pawh sorkar damdawi-inte hian private damdawi-inte hi an tluk meuh lo a, hei hi thil kal zel dan tur pawh niin a lang. A pawimawh zawk erawh chu sorkar hian sum seng ve ṭeuh si hian khawl changkang leh ṭha hi a lei thei lo palh a ni mai thei a, chutiang a nih chuan a fuh lo hle a ni. Tlemlai deuh khan sorkar damdawi-ina inenkawlna tur khawl man to tak tak, hman tlak tak tak si loh lei a awm nia sawi ṭhinte hi a thinurthlak a, chutiang ti duh khawp sorkar hotu leh ram hruaitu kan lo nei tawh ṭhin a nih chuan ram tana pawi khawihna hial a tling ang.

Chief minister hian an sorkar tirh khan sorkar hnathawka a hotu liante ko khawmin ṭan lak an tum dante a hrilh a, kha khan Mizo mipuiah beiseina sang tak a siam. Hun a kal zel a, a sawitu lamin emaw, amah thlawptu minister leh an thawhpuite'n emaw chief minister thusawi kha an bawhzui ṭha tawk lo niin a lang a, a fuih leh hrilh ber sorkar officer lam pawhin an zawm vak lo niin a lang a, a pawi khawp mai.

Hetiang nikhua hian kan thuawih lotute kan beih lêt hrep ringawt hi a finthlak loh a, kan thu hi awih tlaka an ngai lo emaw, an awih duh lo emaw a nih chuan thupetu lam pawh kan inenlet a ngai tihna a ni. Chief minister-in sorkar hnathawk liante an ṭan a ṭul thu a sawi hian, ṭang tura thu pe theitu leh fuih theitu chu amah hi a ni a, a thu hi zawm tlakah an ngai nge ngai lo tih lo thlir zui ila, an ṭan leh ṭan lohte hi an vil zui em, tihte thlengin mipuiin i lo en ang u.