A zung nena phawi

Kau Tlabung Mini Hydel Project leh Tuipanglui Mini Hydel Project-a thubuai awmah Special Judge (PC Act) chuan tun hnai khan thutlukna a puang a, thil ti dik lo tia puhte'n thiam an chang. Court chuan, thubuai chhuitute'n finfiahna an neih loh thu tarlangin, 'Hetianga thil dik lo finfiahna awm loa Court-a thil ngaihtuah hi hun khawhralna mai a ni' a ti. He thila FIR leh PIL thehluttu PRISM chuan thuchhuah siamin Kau-Tlabung Mini Hydel Project leh Tuipanglui Mini Hydel Project (MHP) thubuai tâwp dan chu mak an tih thu leh nuihzatthlak an tih thu an tarlang.

Mizoram sorkar hian corruption an do mai ni loin a zung nen pawt phawia phoro an tum a, hei hi chief minister-in vawi tam tak a lo sawi tawh. He sorkar hian thil ṭhenkhatah chuan corruption hi a haw tak tak emaw tih mai turin ke a pen chak a, a fakawm a; nimahsela thil tam takah hi chuan corruption hi a haw tak tak lo ang maiin a hmuh theih.

Tun ṭuma Kau-Tlabung MHP leh Tuipanglui MHP thilah hi chuan court thuremna a nih tawh avangin awih leh awih loh theih a ni lo a, a thu anga pawm mai tur a ni ang. Hei hi kan pawm lo a nih chuan court-ah vek kala a dik lohzia finfiah tura beih hi a kal dan tur a nih hmel a, court thuremna lo sawisel hi a finthlak lo a, thil tih âwm pawh a ni lo.

Chutihlaiin he thubuai kalkawng hi a thuiin sawi tur a tam hle a, High Court leh Supreme Court pawh a thleng hial a, a ngaihventute tan chuan a thubuai kal dan hi ngaihnawm a tling hial ang. Tunah chuan court-in thu-tlukna a siam fel tawh a, thil tisuala puhte'n thiam an chang a, an puhnaah finfiahna an hmu lo.

Corruption hi kan do dawn a nih chuan kawng engkimah fir taka kan inteh a, huaisen taka kan kal ngam a ṭul. Eirukna kan tih hi khawi china do tur nge a nih a, eng ang chiaha beih chi nge a nih pawh kan hriat chian a ṭha. Corruption hi a zung nen kan phawi a, kan phoro ngam dawn a nih loh chuan a thu maia sawi hi chu i bansan tawh ang u khai.