NEDP hi eng tak ni maw?

Agriculture minister chuan, New Economic Develoment Policy (NEDP) chu NLUP thlakna a ni lo tih sawiin, NEDP hnuaiah MLA-te'n cheng nuai 100 zel bial chei nan an neih dawn thu a sawi a; NEDP hnuaiah MLA-te'n cheng nuai 70 zel khaw cheina turin sum an nei dawn tih a ni bawk.

Mizoram sorkarin flagship programme a nei a, chu chu NLUP a ni. NLUP kalphung hi chu mipui pawhin an hre bel thawkhat tawh a, a hlawhtlin dan leh a hlawhchham dante thlengin an teh thiam tawh ang. NLUP mipuiin an ngaihven laiin sorkarin ko a thlak ta emaw tih turin NEDP a rawn au chhuahpui a, sorkar hotu lam chu NEDP kalphungah hian an chiang tawh turah ngai ila, mipui erawh an la bangbo tlang hle.

Tun hnaia Agriculture minister thusawia NEDP chu NLUP thlakna a nih loh thu a sawi hi chu mipui pawhin an hrethiam turah ngai ila, mipui hmelhrIat tawh NLUP leh NEDP hi thil hrang daih a ni.

NEDP hnuaiah hian project lian tham hrang hrang thawh tur niin an sawi ṭhin a, sum pawh
ṭhahnem tak dah a ni a, state-in a mamawh huna hman theiha dah lawk vek niin an sawi. Tunah thil thar ang deuh an sawi chhuak leh ta a, NEDP hnuaiah MLA-te'n cheng nuai 100 zel bial chei nan an nei dawn a, khaw cheina atan cheng nuai 70 zel an nei dawn bawk.

NEDP hi a sawitu azirin a dang ta zel emaw tih mai tur a ni a, he policy hnuaiah hian thil thar dang pawh kan la hmu dawn chauh a ni mai thei e. Tuna bial cheina atan cheng nuai 100 an neih tur leh, khaw cheina atan cheng nuai 70 an neih tur hi a belhkhawm chuan cheng nuai 170 a ni a, kum 2018-a MLA inthlan hmaa dawnah chuan thil duhthusam a ni hial awm e.

Engpawhnise sorkar hian a mipuite hnenah NEDP hi eng chiah nge a nih a, he policy hnuaiah hian eng thilte nge kalpui a tum a, a nihna kimchang hi ziaka dahin sem chhuak thei se a ṭha awm e.