Hri leng insawi ṭhaih

Thosi seh aṭanga inkai darh theih natna chi khat, dengue natna chu tunlai hian Mizoram hmun ṭhenkhatah hmuh tur a awm a, Integerated Diseases Surveillance Programme (IDSP) lam chhinchhiah danin Mizoramah dengue vei mi 58 hmuh chhuah a ni tawh.

Mi thiamte sawi danin Mizorama dengue an hmuh chhuah hi dengue hlauhawm ber chi a ni lo a, a veite hi hmuh chhuaha enkawl vat an nih chuan awlsam taka tihdam theih a ni.

Thil chinchang hre loa thehdarh chiam leh insawi ṭhaih vak hi mi ṭhenkhatin an ching ṭhin a, hei hian thil hre tlem zawkte a tichiaiin a tibuai fo
ṭhin. Dengue chung-changah pawh tlemlai deuh khan Aizawla veng pakhat chu hming hmerha sawi lan a ni a; nimahsela mi thiam zawkte sawi hmangin tunah hian veng khatah ni loin veng hrang hrangah dengue hi hmuh chhuah a ni tawh a, khawilai veng emaw bik natna a ni lo.

Dengue hi thil hlauhawm lo tia inzirtir pawh a fuh lo a, enkawl a nih loh chuan natna hlauhawm tak a ni thei tho. hmunpui zawkah pawh an inenkawl tlai chuan an thihpui ve mek bawk a, dengue natna vei hi a hunlaia enkawl an nih loh chuan thihna hial thlen thei a ni a, namnula ngaihthah chi a ni lo tih kan hriat a ṭha awm e.

Hetihlai hian dengue hi natna hlauhawm a nih rualin a hun taka ṭha taka enkawl chuan a hlauhawm lo a, harsa lo taka tihdam theih a ni. He natna leng mek pawh hi tawngpawng hlauh chiam a sawt lo a, a invenna lam hi sawi uar ila, thosi thahna hlo chi hrang hrang leh thosi len hmang ṭha ila, thosi pian theihna tura tui tlingte tibo ila, i ṭang tlang zawk ang u.

Natna hri lengte hi insawi ṭhaih chu a ni lo a, chumi lehlamah chiah chuan hre chiang loa a hlauhawm loh thu lo sawi chi pawh a ni hek lo. Hetiang thilah hi chuan mithiamte thusawi ngaihchan thiam a, an thurawn zawm hi a himin a finthlak ber a ni.