Ruihhlo do tibuaithlaktu

Central YMA hnuaia ruihhlo dotu SRS-te chuan tun hnai khan ruihhlo zuar ṭhang tak nia puh chu Tuirial Airfield Veng chu a heroin kawl lai nen an man. SRS tarlan danin he mi hian ruihhlo a zawrhna vanga sum leh pai a ngah tawh avangin amah man theitu lamah hmelhriat leh tihlungawi a ngah avangin man a harsa hle a; amah mantute pawh nasa tak takin a vau a ni.

Mizoramah ruihhlo do beihpui thlak reng anga ngaih ni mah se, ruihhlo hi a hluar zual zel emaw tih mai tur a ni. Helam ngaihven mite chuan ruihhlo hi a ‘zuar ṭhang’ tia kawh tur pawh an hre nual a, eizawnna atan bera ruihhlo buaipui hi tam tak an awm. Ruihhlo zuar hlun deuhte chuan sum an ngah tawh a, thurualpui leh hmelhriat an lo nei tawh a, dan leh hrai thlenga an hriat nual tawh avangin man pawh an harsa hle niin an sawi.

Ruihhlo do tibuaithlaktu tak pakhat chu a zuartute’n ‘thurualpui’ an nei ṭhin tihlai hi a ni. A mantu lam tura ngaihte hi a zuartu lamte nen inhre hnai tak tak an lo ni leh mai ṭhin a, tun hma pawhin a man tura sorkar mi rawih zingah ruihhlo zuartu lo ni zawkte pawh man tur an awm ṭhin a nih kha. Tunah hian sorkar lam hnathawk zingah hian khehpuam leh ruihhlo danga rinhlelh kaite an han awm leh nawlh ṭhin hi a vanduaithlak hle.

Ruihhlo zuar ṭhang deuhte hi chuan dan hre mi lamah pawh hmelhriat an nei fur a, an tan rei theih lohna tura dan hmanga thil tih pawh an thiam hle. Miin dan hmanga thil a tih miau chuan mipuiin tang rei lo ti ṭhin mah ila an tal chhuahna tur tawk hi an hre zel a, a puitu tur ukil rawihna sum leh pai an lo nei tawh bawk nen, ruihhlo do hi a buaithlakin a hautak phah takzet.

Mizo zawng zawng hi a tak takin ṭang rual ngat ila chu ruihhlo do hi tun aiin a sâwt ang a, SRS leh a dotu lamin an rinhlelhte man an awl sawt ang a, rorelna hmunah pawh tun aiin ruihhlo tawlhtute hi an ngampa lo zawk tur a ni a; tunah hi chuan ruihhlo zuar ṭhang tak tak hi chuan man nih pawh an zak mang lo a, tang tur pawhin an inring lo a, a tan pawh an tang rei ngai meuh lo chu a nih hi!