Thing phun leh enkawl zui

‘Ruahtui khâwl nan thing i phun ang u' (Plant trees and catch the rain)' tih thupuia hmangin Green Mizoram Day chu hman a lo ni leh ta a, Mizoram hmun hrang hrangah hman niin, thing eng emaw zat phun a ni.

Kum 1999-ah Green Mizoram Day hman ṭan a ni a, kum 26 chhungin Day pualin Mizoramah thing ṭiak nuai 46 chuang phun tawh a nih thu tarlan a ni. Thing phun tawh zat hi a tam hle mai a, a zatve pawh dam chhuakin puitling chho se chuan ram tan ṭhatpui tham a ni.

Ni khat thil thua thing ṭheuh hi a ṭha ngei a, mahse, kalpghungah a ṭhat ber dan a ni kher lo ve thei. Day hmannaa thu ṭha tak tak sawi pawh a ṭha a, mahse, awmzia a neih thui reng em tih erawh ngaihtuah tham a ni. Day-a thu ṭha tak tak sawi ṭhinte hian a thleng thui tâwk lo a ni thei a, a thlen chinah pawh mi tam takin an benga rawnga an thun tak tak lo a ni thei bawk.

Thing leh mau ṭha zawk kan neih leh a ṭulzia mipuiin chiang lehzuala an hriat theih nan tih dan thar ngaihtuah chhuah a ṭulin a lang. Mizorama chhungkaw tin dêng chhuak turin inzirtirna lehkha semte ni se, a ṭangkai hlein a rinawm. Thuneitute ngun zawkin ngaihtuahna seng se, hma la zui zel se a ṭha ang.

Mizorama lui hrang hrangte ṭhal laiin a tlem tial tial thu sawi a ni ṭhin a, a tuartu chu mipui kan ni. Tuihna humhalh a ṭul a, tuihna siamtu thing leh maute kan neih ṭhat leh theih nan ṭan lak a ṭul. Sorkar chauh ni loin, kohhran leh pawl zawng zawng leh mi tinin mawhphurhna kan nei a ni tih kan hriat thar a ngai.

Thing phun chungchangah hian kalphung ngaia kal reng ringawt hi a ṭha ber lo thei a, a hlâwk dan ber a ni lo thei a, tih dan ṭha zawk a awm thei. Tih dan leh kalphung ṭha zawk hmu chhuak turin ngaihtuahna sen peih a pawimawh.

Engpawhnise, ramngaw, thing leh maute kan neih ṭhat leh theih nan theihtawp kan chhuah tlan a ngai. Thing phun belh zel chungin kan thing phunte a dam khawchhuah theih nan leh a puitlin theihna tura enkawl zui hi ngai pawimawh lehzual ila; chumi tur chuan kan thing phun ṭheuhah a phuntute'n mawh la zui se a ṭha viau ang.