Thisen pek - mi nunna chhanna

Vawiin June 14 hi World Blood Donor Day a ni a, mite nunna chhanna atana thisen petute puala ni bik a ni. Khawvelin a ngai pawimawh a, mihring hriselna lam buaipuitu pawl lian bera chhàl ngam World Health Organization pawhin khawvel huapa hriselna lama ni pawimawh bik 11 a puan zinga mi a ni.

World Blood Donor Day hi kum 2004 aṭangin June 14-ah hman a ni a, Mizoramah chuan kum 2007 khan hman ṭan niin, pawl hminga thisen pe ṭhate hnenah chawimawina hlan ṭhin a nih bakah, eng emaw changin mimala thisen pe ṭhate chawimawi ṭhin a ni bawk.

Sorkar kum liam ta, 2024-25 chhung khan Mizoramah thisen unit 34,752 pek niin, chu'ng zinga unit 32,566 chu pek bik nei loa a thlawna pek niin, pek zawng zawng aṭangin 93.71% a tling. Kum 2024-25 chhungin Mizoramah blood donation camp ṭum 611 huaihawt niin, chungah chuan thisen unit 22,602 lai pek a ni bawk.

Thisen peka Mizoram dinhmun en hian a thlawna thisen pekah Mizo ṭhalaite mai bakah, Mizorama hnam dangte pawh kan harh ta hle tih a hriat. Thisen pek lam buaipuitute chuan India ramah pawh voluntary donation-ah a ṭha ber pawl kan nih thu an sawi ṭhin a; a lawmawm tak zet a ni.

Association for Voluntary Blood Donation (AVBD)-te'n thisen pe ṭha pawlte hnenah chawimawina an hlan ṭhin hi a lawmawm a; thisen pek zelna kawnga pawl hrang hrangte leh mipui tiphurtu leh tiṭangtu a nih ngei a rinawm a, chhunzawm zel se a ṭha hle ang.

Hetih lai hian, thisen pek hi chawimawina leh lawmman dawn beiseia tih chi a ni lo a, chawimawi beiseia thisen pek hi chu mimal leh thisen pek rûnpui buatsaih ṭhin pawl hrang hrangte rilru puthmang tur a ni lo. Thisen kan pe a nih pawhin, tute emaw aṭanga chawimawina leh lawmman beisei lo ila; miin min chawimawi a nih leh lawm takin pawm mai ila a ṭha.

Thisen mamawh an awm zel bakah, an pun tial tial avangin thisen pek tawh a awm thei lo. Kumina World Blood Donor Day thupui, 'Give blood, give hope: together we save lives,' angin, ṭhahnemngai lehzualin thisen pe zel ila; mite hnenah beiseina kan siam ang a, mi tam tak nunna kan chhan theih dawn a ni.

Hmanlaia 'ṭhian chhan thih ngam' an tihte chu rál leh sa hráng hmaa mi huaisente an ni a, mi nazawng tan nih theih a ni lo. Tunah chuan rál leh sa hráng an awm tawh lo a, tunlaia 'ṭhian chhan thih ngam' kan nihna lantirna remchang ber chu thisen pek a ni; mite nunna chhan turin thisen pek i uar zel ang u.