Mizote tan YMA kal zel se

Nimin khan YMA Day a ni a, Pathianni a nih avangin YMA branch tam tak chuan Inrinni khan an lawm a, hlim leh nuam takin hun an hmang hlawm.

Mizote'n kan hnam thil kan ngaihlu tial tial niin a hriat a, YMA pawh hnam nunphung vawngtu pawimawh tak a nih angin, YMA Day pawh mipuiin kan hlut thar leh niin a lang a; a lawmawm.

Mi tam takin YMA Day an ngaihlu thar leh nia a lan rual hian, YMA ngai pawimawh lêm lo an pung ve zel tho niin a lang a; mimal rilru a ni a, indem chiam chi a ni lo mai thei. Mahse, Mizo mipui hian YMA nihna leh hmalaknate kan ngaihtuah chian a, a hlutzia kan hriat thar leh a ṭha hle mai.

YMA hlutna te, hma a laknate hi hi tun hma thil aṭanga teh vek a rem lo. Hun a inher a, Mizo zia leh nunphung a danglam hret hret a, YMA ṭangkai dan pawh a danglam ve hret hret. Tun hmaa tih ṭhin, tuna tih ṭul tawh lêm lo te, tun hmaa tih ngai loh, tunah tih ṭul tate a awm a ni tih hriat a ṭha. Hmasawnna kal zel leh Mizo mipui nâwlpui sûkthlêk uluk taka thlir chungin YMA hian hma la zel se.

Tunlaiah Mizo ṭhalaite a tlangpuiin an meng rei a, zingah an tho tlai leh a; khawpuiah a ni zual. Ṭhalai tam tak men rei chhan leh thawh tlai chhan hi thil ho mai maia ngaih theih a ni tlangpui a; mahni, chhungkua, khawtlang, ram leh hnam tana ṭangkaina em em nei lo a ni tlangpui.

Zingah ṭhalaite an thawh tlai ṭhin avangin tunlaiah chuan zing karah hnatlang koh ngam pawh an awm tawh meuh lo. He Mizo ṭhalaite ze ṭha lo hi YMA hian siamṭhat tum ta se, a ṭul angin infuihna leh inzirtirna han uar thar leh ta se; zing kár hnatlangte ko luiin, inphût na deuh ta ila, rah ṭha tak a chhuah thei mahna.

YMA kal zelna turah rilru zau tak put a ṭul rualin, rilru zîm, khawhawi zau lo nih a ṭul hun a awm thei ang. Chungte hre chung chuan Mizo ram leh hnam tana ṭha ber tur thlirin hruaitute'n YMA kalpui zel se. Mizo mipui hian YMA hi a tlakhniam kan phal tur a ni lo a, a mualpho tur kan vênpui zawk tur a ni a, hma a sawn zel theih nan Mizo mipuiin mawhphurhna kan nei a ni. YMA vul zel rawh se.