Mipa thi an tlem theih nan ṭan lak a ṭul

Inter Branch YMA Football Tournament 2025-a champion Republic Vengin champion lawmna June 14, 2025-a an hmanah Sports & Youth Services Minister-in, Mizo ṭhalai zingah hmeichhia aiin mipa thi an tam thu te, mipate an harh thar a ṭul thute a sawi.

SYS Minister thusawi hi thu dik a ni a, tunlaia Mizorama sorkar, kohhran leh mi tam takin an vei leh hma an lak mekna a ni. Thil hrang hrangah hian hma latu bik an awm a ngai ṭhin a, hma la mektute'n theihtawp chhuah zel se, kan ṭan tlan chuan hma kan sâwn ngei ang.

Mizo ṭhalai zingah hmeichhia aiin mipa thi an tam thu leh, a bik takin ṭhalaite zingah nasa takin mipa thi an tam zawk tih a chiang. Kohhran ṭhalai pawl member zingah mitthi zawng zawng zinga 80% chung lam chu mipa an ni ṭhin.

Zirchianna mumal tak awm lo mah se, ṭhalai zingah hmeichhia aia mipa thi nasa taka an tam zawk chhan hi ruihhlo vang a nih a rinawm. Chutih rualin, nasa taka mipa thi an tam zawk chhan hi zir chian a, a chhan dik tak hmuh chhuah a ṭul a, sorkar hian hma la thei se a duhawm. Sorkarin hma a la thei lo a nih pawhin, páwn lam mite ruaiin zir chian ngei ni se a ṭha hle.

Kum eng emaw ti chhung chu Mizo mipate an hek lutuk a, hetiang zel a nih chuan Mizo hnam hian harsatna a la tâwk ngei ang. Chuvangin, mipa thi an tlem theih nan awmze nei taka hmalak a ṭul a; chumi atan chuan na zawk leh awmze nei taka ruihhlo do hi thil pawimawh ber zinga mi a nih a rinawm.

Ruihhlo do chungchangah te, mipa thi zat tihtlemna tura hmalakna hrang hrangah pawl, kohhran leh mipuiin mawhphurhna an neih vek rualin, a bulpui ber, mawhphurhna lian ber chu sorkar a ni. Ruihhlo donaah sorkar a harh thar a, hma pawh a la mek; thâ thlah loin theihtawp chhuah zel rawh se.

Chutih rualin, sorkar ringawt tan harsatna chinfel theih a ni lo. Kohhran te, tlawmngai pawlte leh mipuiin mawhphurhna kan nei vek a; chung kan mawhphurhnate chu kan hriat chian a, kan pawm a, a tak takin theihtawp chhuah ṭan lak ṭheuh a ngai. Ruihhlo hi ṭanrualna hmang leh Pathian chaklna ring chunga do hneh hun a la awm ngei ang.