ADC-te'n Anti Defection Law an mamawh

Chakma Autonomous District Council (CADC) sorkar lai, chief executive member Molin Kumar Chakma kaihhruai chu June 16, 2025 khan bûk a ni a, thlawptu a ngah loh avangin paih thlak a ni.

BJP-in sorkarna an chelh mek CADC sorkar lai paih a nih chhan ber hi sorkar BJP member tam berin ZPM party an zawm vang a ni. ZPM hian member 19-ah MDC 16 an neih avangin sorkarna an siam tura ngaih a ni a, sorkar an siam hun tur erawh hriat a ni lo.

CADC sorkar paih thlak a ni hi a zialo hle mai. Tunah chuan sorkar a tlu tawh a, tu party pawhin sorkarna siam leh se, ṭha takin, tluang takin sorkar kal tawh se a ṭha hle ang.

Lai ADC-ah pawh hun rei tak sorkar a mumal tawh lo a, December 2020-a inthlan hnuah CEM panga an awm tawh. MDC eng emaw zat chu party-ah an insawn kual vel mai mai a; hetianga party awmna sawn kual chhen hi mi dazât nihna a ni.

ADC sorkar ṭhenkhat a nghet thei lo hi mipuiin an tuar hle mai a; tunah pawh LADC-ah chuan 2025-26 budget pass tawh mah se, sût leh a nih avangin sum a awm lo. Thawktute'n hlawh an la thei lo a, hna thawh theih a ni lo. A pawi hle a ni.

District council-ah inthlana thlan tlinna party chhuahsana party danga an lut ṭhin hi a zialo tak zet a, thlang tlingtu mipui phatsanna a ni a, mi rinawm lote zia a ni tih hria se a ṭha khawp ang. Mi rinawm lo chu ram hruaitu tlak an ni lo.

Heti taka Mizorama district council sorkar a nghet lo hi tibuaitu an awm vang niin a lang. State-a sorkar lai emaw, Central-a sorkar lai emawin district council-te an tibuai a, sum leh thuneihna nena inthlêm ṭhin niin a lang. Inthlêm kual vel lo se party an chhuahsan kual vel ngawt lo ang. Hetiang hi a zialo em em a, tun hnuah awm tawh lo se a duhawm.

DCMA Minister-in tun hnai khan LADC hotute nen an inkawmnaah LADC sorkar term khat chhungin CEM panga an awm tawh chu veiawm a tih thu sawiin, MDC-te chu inenfiah turin a chah. Minister thusawi hi a dik em em a, mahse, sawi ngam tur a ni em tih erawh ngaihtuah tham tak a ni.

Mizorama ADC-te'n an mamawh chu MDC-te party danga an pakai theih lohna turin Anti Defection Law neih a ni a, hetiang dan hi hman ni ve se chuan tun ang em ema MDC-te an pakai kual ang hi a awm lo ang. ADC-ah Anti Defection Law hman a nih theih nan Mizoram sorkarin sorkar laipuiah thu a thlen tawh niin DCMA Minister chuan a sawi a; a puitlin ngei theih nan chak takin bawhzui ngei teh se.