Theihtawp chhuah tlang zel se

Mizoram Youth Commission (MYC) chuan kumin Civil Services Examination Prelims-a Mizo tlingte chu Mains exam turah an inbuatsaihnaah puih a tum a, an mamawh apiang tumsak a tum.

Kumina central civil service prelims exam-ah khan Aizawl Centre-ah mi 596 inlan aṭangin mi pariat chu Mains exam turin an tling a; chungte chu Mains exam tura an inbuatsaihnaah an mamawhte MYC-in tumsak a tum dawn a ni. Mizote central/all India service-ah kan tlin theihna tura MYC-in hma a la hi a lawmawm a, rah ṭha a chhuah ngei beisei phawt mai ila.

UPSC Prelims-a mi pariat lai an tling hi a lawmawm phawt a, mahse, a la tawk lo a, kan lawmna a famkimna tak tak chu personal interview thlenga an tlin chhohah a ni ang.

Mizote UPSC buatsaih CSE-ah kan tlin loh theih lohna a rei tawh. IAS-ah Mizoram mi Mizo phei chu kum sawm chuang kan tling tawh lo a, IPS-ah phei chuan kum 30 chhung kan tling lo tawh a, a rei vang vang hle. CSE-a Mizoram MIzote kan tling thei lo hi mipuiin kan vei tlang a, sorkar pawhin a vei hle a ni tih a hriat.

Sorkarin a vei a, MYC kaltlangin tun hma aṭangin sum tam tak sengin hmalak a ni tawh ṭhin. Mahse, a kalphung a la fuh loh vang nge, tun thlengin a hlawhtlinna kan la hmu lo. Tunah pawh MYC-in hma a la mek a, an hmalakna hian awmzia nei tawh ngei se a duhawm tak zet.

MYC leh sorkar ten theihtawp chhuah zel se, Mizo ṭhalaite all India service leh central service-ah an tlin ngei theih nan theihtawpin hma la zel rawh se. Chutih rualin, a pawimawh ber chu exam hmachhawntu mihring an ni. Sorkarin nasa takin ṭan la mah se, a mihringin theihtawp a chhuah si loh chuan awmzia a awm lo a; sorkarin pui miah lo pawh ni se, a mihringin a zir miau chuan hlawhtlin theih a ni.

CSE hmachhawn ṭhinte hian theihtawp an chhuah ṭhin ngeiin a rinawm a, chuti chunga an la tling thei si lo a nih chuan theihtawp kan chhuah tawhna chu a la tawk lo tihna a ni; tih dan, zir dan, inbuatsaih dante pawh ennawn a ṭulin a rinawm. Chuvangin, tuna theihtawp an chhuah tawh bakah hian theihtawp dang han chhuah leh hram se; central/all India service officer neih hi Mizote'n kan mamawh tih hriain, ram leh hnam hmangaihna thinlung nen han ṭang sauh sauh zel teh se.

Kumina CSE Prelims-a tlingte hian ṭha taka Main exam an hmachhawn theih nan leh an tlin ngei theih nan duhsakna kan hlan. Ṭha taka an inbuatsaih theihb nan chhungkua, ṭhiante leh khawtlang leh kohhran thilah hun thawl ṭha pekte pawh a ṭulin a rinawm. Ṭhenkhat chu hna thawk mekte an nih a rinawm a, sorkar emaw, private emaw pawh ni se, an inzirna atan an thawhnate'n hun thawl siamsak siamsak thei se a duhawm.