MUHCS ennawn leh siam rem a ṭul

Mizorama private hospital pawlte'n press release an siam a, Mizoram Universal Health Care Scheme an zawm theih rih loh chhan an tarlang. An harsatna pakhat chu a bá ringawta ni tin damlo enkawl chu an tan a harsa tih a ni a; chu ai maha harsatna lian zawk chu rate tlawm lutuk a ni.

Private hospital-te'n damlote a thlawn veka enkawl phawt (cashless) harsa an tih thu hi chu kan hre tlangpui tawh a; hei hi chu han indawr zel se, sorkar lamin cheng nuai 50 pek lâwk a inhuam bakah, sorkarin rang takin bill a pe ngei dawn tih a chian chuan inrem mai theihna tur a nih a rinawm.

Harsatna lian zawk leh private hospital-te tana pawm harsa tak nia lang chu inenkawlna man (rate) hniam lutuk a ni. Private hospital-te tarlan danin, MUHCS hnuaia damlo enkawlna man (rate) hi tuna Mizorama private hospital tam takin rate an hman lai aiin a tlawm fe zawk a, tlangpuite aiin 50%–80% velin a hniam zawk, an ti. A awmzia chu private hospital-ah ECG tih man Rs 400 ni ta se, sorkarin Rs 200 emaw, a aia tlem emaw ni turin a bithliah tihna ang a ni.

A thlawna damlote enkawl phawt tur a nih piah lamah, rate hniam taka sorkarin a bithliah hi chu private hospital tan pawm harsa tak a ni ngei ang a, an pawm thei lo pawh hi a âwm viau.

Hetih lai hian, MUHCS hian phai lama empanelled hospital-te chu rate sang tak, an rate pangngai ang deuh thoin a tihsak nia sawi a ni. Phai lama damdawi-in ṭhate phei chu inenkawl man a sang a, Mizorama private hospital-te aiin a sang hlawm.

Phaia damdawi-inah rate sang tak an pek theih laia Mizorama private hospital-te rate hniam taka kalpui an tum si a nih chuan a 'fair lo' em em a; mahni hnampuite hnuaichhiahnaah pawh a ngaih theih hial ang. Chuvangin, Mizorama private hospital-te tana rate siam hi chu doctor, clinical experience nei ṭhate thuràwn la chungin ennawn ngei a ṭul niin a lang.

MUHCS-ah hian tun June thla chawlhkar khatna vel thleng khan mi 5,082 an inziak lut tawha tarlan a ni a, thla hnih chuang chhunga heti zat chauh an inziak lut hi a mak hle mai!

MUHCS hi healthcare scheme ṭha tak a nih chuan mipui inziah luh ruih ruih âwm a ni a, mahse, an inziak lut ruih ruih si lo! Healthcare scheme ṭha tak, mahse, mipuiin an zawh tâwk aia ú daih min barh a ni mai lo maw? Sorkar hian MUHCS-a inziak lut an tlem chhan hi zawng chhuak se; insiam rem a ngaihna laiah mipui zawh tâwk hre chungin insiam rem ngam rawh se.