Kohhran inkhawm pawisa chawitir

Sakawrdaia Evangelical Free Church of India (EFCI) kohhrante chu sorkar dan bawhchhiaa Krismas tuka an inkhawm avangin Police-te chuan Rs 5,000 an chawitir a; an kohhran hruaitute chuan dan an bawhchhiat avanga Rs 5,000 chawitir an ni chu an hriatthiam thu an sawi rualin Krismas hmanga an inkhawm chu an inchhir loh thu an sawi.

Kohhran an ni emaw, eng pawl pawh ni se Covid-19 hri lêng zel tur venna atan sorkarin dan a siam a, punkhawm a phal lo a, dan an bawhchhiat avangin hrem ngei hi an phu a ni. Anni lam pawhin dan bawhchhia an nih an pawm thiam a, nimahsela Krismas an ngaih hlut em avangin dan bawhchhiaa inkhawm hi an rel ta niin a lang.

Hetihlai hian tun hnaiah kan sorkar hotu lute chet vêlna lamah Pathian biaa inkhawma mipui pungkhawm aia Covid-19 darh theihna awlsam tura punkhawmna lian tham a awm zauh zauh a, sorkar programme a nih avangin Covid-19 hi a hlauhawm lo bîk a ni si lo. Hman ni lawkah pawh khaw pakhatah chuan kan mi pawimawhte lo hmuakin an lo zawn hial a, khatiangte kha Covid-19 darh tur venna dan siam hian a huam ve lo a nih chuan thil mak tak chu a ni phawt mai.

Sakawrdai police-te'n dan chu dan a nihna anga ṭha taka an kengkawh hi a lawmawm a, EFCI kohhran lam pawhin an hriatthiam thu leh Krismas an dah pawimawh avanga hre reng chunga inkhawm an nih thu an sawi. Hetihlai hian kan VIP-te chet vêlna thenkhatah mi 35 aia tam pun khawmna chu a awm ngei tih a document pawh phawrh theih mai tur social media lamah a awm reng a, hengte hi an hai der nge VIP an nih avangin punkhawm phalna an nei bîk?