Vigilance Awareness

Vigilance Awareness Week chu October 31 - November 5 chhung hian India ram hmun hrang hrangah hman a ni a, kumin thupui chu, 'Public participation in promoting integrity and eradicating corruption' tih a ni. Central Vigilance Commission chuan Sardar Vallabh Bhai Patel-a pianchampha October 31 aṭanga chhiar ṭana kar khat chhung hi Vigilance Awareness Week atana hman turin a rel a ni.

Mizoram hi lehkha thiam tamna rama chhal theih a ni a, ziak leh chhiar thiam lamah phei chuan India rama a sang ber pawl a ni reng ṭhin a; nimahsela 'Vigilance Awareness' bikah hi chuan kan hniam hle niin a ngaih theih. Eirukna leh hlemhletna kan duh lohzia leh eirukna avanga kan ramin a nih tur a nih phak loh dante sawi sawi mah ila, he hlemhletna hi eng nge a nih a, tute nge hlemhle a, tute hi nge dan bawhchhia, tute hi nge eiru ṭhin tihte pawh kan hre thiam tawk lo hle niin a lang.

Sorkar laipui aṭanga hma-sawnna hna thawhna tura sum lo kal dan te, project leh programme hrang hrang kalphungte hi Mizo zingah zir chiang peih kan tam lo hle mai a, hei hian eirukna kan tihte hi a tihluar ni pawhin a ngaih theih. Thingtlangah leh khawpuiah pawh sorkar aṭanga kan chanvo pawh kan hre mang lo a, a hre chiangte hian kan hriat lohzia an hriatin mipui an zuam a, langsar leh huamhauh takin an eiruk ngam phah ṭhin a ang ber.

Tunah RTI Act hman a ni tawh a, kan hriat duh apiang sorkar thuneihna behchhanin kan zawt thei a, hengte hi state dangah chuan eirukna lian tham hai chhuahna hmanruaahte an hmang a, sorkar khalh ngilna ṭangkai tak a ni thei. Mizorama kan hman danah erawh hi chuan a la ṭangkai tawk lo a, eiruk do tur emaw, eiruk tur venna turin emaw RTI Act tluka ṭha hi hmanrua a awm mang lo chung pawhin kan hmang
ṭangkai tawk lo.

Mipuite hian sor-kar hi kan vil thei a, eptu party ni kher lo pawhin khua leh tui ṭha chuan sorkar vilna kawngah tih theih tam tak a nei. Hengte hi taima taka thawk a, ram kalphung fel lo vil a, huaisen taka ke pen tur chuan sorkar thil kalphungte kan hriat chian a ngai a, kan inzir taimak a ṭul a; thil hre tak leh huaisen tak siam ṭhat hna thawktu chu nei ila kan rama eirukna kan tih tam zawk hi chu ven theih a nih a rinawm.