Kan ram politician-te leh corruption

Kum eng emaw ti kal taa Lawngtlai by-pass road siamnaa sum tihchingpen thubuai tun hnaiah a langsar hle mai a, mipui pawhin an ngaihven viau niin a hriat.

Lawngtlai by-pass road siamna tur sum cheng vbc. 11 vel aṭangin eng emaw zat tihchingpen a awma sawi a ni. Sum tihchingpentua puhte chu Lai Autonomous District Council-a chief executive member ni tawh ṭhiau mi pathum an ni a; June 18, 2025 khan Special Court (PC Act)-ah an inlan nghe nghe.

Lawngtlai by-pass road siamna tur sum tihchingpen chungchang hi Anti Corruption Bureau-in an chhui a, May 2025 khan court-ah chargesheet an thehlut tawh. Chargesheet-ah hian LADC CEM ni tawh mi pathumte tih loh mi dang hming a lang lo nia sawi a ni.

Thubuai hi PC Act Court-ah chai chhoh a ni dawn a, Court-in dik takin ro a rel ang a, LADC CEM ni tawh pathumte dinhmun zel tur chu hunin a la hril ang. Tunah chuan sum eiru tia sawi tur an ni lo tih hriat a ṭha.

LADC CEM ni tawh ṭhiau, politics-a hming langsar tak takte eiruk thubuaia an hming a lang rual ṭhuau hian ngaihtuah a tithui hle. An zavai hian active politician an ni a, ram hruaina lama mi pawimawh an ni mek hlawm a, ram hruaitu la nih zel tumte pawh an nih a rinawm. Sum an eiru ngei a ni tia sawi theih la ni loin, an chunga court rorel dan tur sawi lawk theih ni lo mah se, kan rama politician-te zingah corruption tlangnèlzia tichiangtuah pawh a ngaih theih àwm e.

Tunah hian LADC CEM hlui mi pathumte an langsar rih a ni mai a; district council ni lo, state sorkar lama ram hruaitu ni ṭhinte leh kan politician tam tak zingah pawh hian corruption-a fihlim lo nia mipuiin an ngaih an awm nualin a rinawm. Mahse, chiang taka han sawi theih leh eiruk thubuaia hlin theih erawh an váng fu si. Mi ṭhenkhat hi chu a eiru ngei a ni, tia sawi dawt remchang si lo, mahse, mipui nawlpuiin eirukna leh hlemhletnaa inhnamhnawih ngeia an rin si an ni àwm e.

Corruption case-a hming lan hrim hrim hi a zahthlak a, a mualphothlak a; ram mipui lakah zaka inthlahrun ngawih ngawihna àwm a nih laiin an zak lem lo a, an inthlahrung chuang lem lo. Hei hi kan hun tawn mek dan a ni. Corruption case-a hming langte hi behchhan mumal awm loa hnuh luh luih an váng viau ang; mipui vantlang lakah hian inthlahrun ve deuhna tham chu a ni. Corruption case-a court-in thiam loh a chantir tawhte phei hi chu politics aṭang leh ram hruaitu nih tumna aṭangin inthiar fihlim se mipui náwlpui duh dan zawk a nih a rinawm.

Corruption do tur hian mawhphurhna nei sang bik te, tih theih nei tam bik te, hmalakna awmze nei bik riaute chu a awm ngei mai a; mi tinin tih theih leh mawhphurhna kan nei. Mipui nawlpuiin kan tih theih langsar tak chu – eirute emaw, eiru nia rinhlelhte ngaihsan loh te, thurualpui loh te, hnualsuat te, an sum leh pai lo hlâwkpui ve tum loh ngamte a ni. A bik takin politician eiru ṭhinte chuan inthlanah sum an chelek ṭhin, chu'ngte chu mipui hian kan lo hnâwl ngam a ngai tawh a ni.