Kawng siamah ṭang lehzual se
June 20-21, 2025 khan Aizawlah engineer-te inkhawmpui, Indian Road Congress neih a ni a, India ram hmun hrang hrang aṭangin engineer ṭhahnem tak an tel.
Road Congress hi Mizoram Chief Minister-in a hawng a; CM chuan, kawngpui siam thar ni si, chhe hma lutuk leh fûr khat pawh daih loa siam ṭhinte tihbo a duh thu te, kawng kual tam lutuk a ngaimawh thu te, hmun tam taka kawng kualte chu sum sen belh lutuk ngai loin ngil zawka sial theih nia a ngaih thute a sawi.
Aizawlah India rama sorkar, company leh mimal hnuaia thawk engineer-te telna inkhawmpui nghah a ni hi a lawmawm a; inkhawmpui senso hautak takah tawp mai loin, Mizoram tan rah ṭha chhuah ngei se a duhawm.
Indian Road Congress hawnnaa CM thusawite a pawimawh hlawm hle mai a; a sawi ang taka thil tih ni se, ramin nasa taka a chhawr tur leh tun aia nasa taka hmasawnna phah theihna tur a ni. CM thusawite hi Mizorama engineer-te leh kawng siamtu company-te'n ṭha taka an zawm ngei mipuiin an beisei ang.
Mizorama kawng siamte hi tlo tak tak awm bawk mah se, hmun tam takah tlo lo lutuk a awm ṭhin hi mipui harsatna siamtu a ni. Tun hnaiah Aizawlah kawngpui siam a ni a, fûr a ni ṭan chauh a, fûr khat pawh daih loa a chhe leh nghal mai ringawt hi chu a zialo tak zet. A siamtu company, enpuitu engineer-te leh sorkar tan mualphona a ni.
Mizoram hi ruahtui tamna a ni a, kan ramna lungte a chang ṭha tawk loa sawi a ni ṭhin bawk a; hengte hi kawng siam tlo loh chhana sawi a ni ṭhin. Chutihrualin, kawng tlo loh chhan chhuanlam ngai reng hman hi chu a fuh lo; hmasawn lo zia a ni.
Kan engineer-te hi thiamna lamah a ṭha tâwkin a rinawm a, kan ram leh a leilung dinhmun an hre chiang tâwk viau tawhin a rinawm. Tlo zawka kawng siam dan an hmuchhuakin an hre tawh ngei pawhin a rinawm bawk a; an thiamna tak tak an lan chhuahtir a hun tawh viau mai.
Mizoramin kawng tlo zawk kan neih theih nan kawng siam lama mawhphurhna nei zawng zawngte ṭang lehzual se; sorkar, engineer, company leh thawktu dang zawng zawngte hian mipui hi kawngpui ṭha leh tlo min hlui tawh teh se.