Myanmar mite chhinchhiah vat a ngai

Central YMA chuan June 20, 2025 khan CYMA Hall-ah Myanmar aṭanga sahimna zawnga Mizorama rawn raltlan hruaitute ko khawmin, infuihtharna hun an hmanpui a; raltlan camp hrang hranga awm hruaitu te, pawl hruaitu leh Chin Hills-a MP leh MLA-te an tel.

Aizawl Bawrhsapin sorkar inkaihhruaina hrang hrangte a hrilhfiah a; CID (Special Branch) SP-in India khua leh tuite chauhin an neih theih Aadhaar card, driving licence, etc. te neih tum lo tur leh ruihhloa sumdawnnaah inhnamhnawih lo turin a chah. CYMA lamin Mizoramah boruak muanawm tak hnuaia an awm theih nan an awmna camp-ah ṭheuh infuih thar tur leh hnam bil leh chi bil boruak siam lo turin an chah a; ruihhloa inhnamhnawih lo tur leh ruihhlo donaah thawktute thawhpui tura chah an ni bawk.

Tarlan danin, Myanmar aṭanga sahimna zawnga Mizorama awm mekte mi 27,751 an awm a; chung raltlante chu sorkar ruahman angin temporary identity card siamsak vek tum a ni.

India rama Mizoram hi Mizote ram a ni a, Myanmar rama eng emaw chen, a bikin Chin state pawh Mizote ram tho a ni. Mizoram leh Chin state-a cheng tam ber chu Zo hnahthlak kan ni tlang a, chhungkhat lainá la inhnai tak tak mi tam tak an awm.

Hnam khat, chhûlkhat kual kan nih miau avangin tun hma aṭang tawhin kan inkalpawh nasa. Mizoram/India khua leh tui mi tam tak Myanmar-ah an lut chhuak reng a, Chin/Myanmar khua leh tui tam tak chu Mizoramah an lut chhuak ṭhin bawk.

Mizoram mi tam takin 'Foreigner is foreigner' an tih chhan leh Myanmar lam mi hnawk an tih chhan ber chu ruihhlo leh sualna hrang hrang a hluar phaha hriat vang a ni. Myanmar lam mite an fimkhur a ṭul a, tun hnaia infuihtharnaa an inchah ang takin, an awm khawmna leh inkhawmna apiangah lutuk awm loa an infuih mawlh mawlh a ngai; chu chu an tana ṭha tur a ni.

Myanmar mite chungchangah hian Mizoram mite pawhin rilru dik kan put a ngai a, 'Foreigner is foreigner' tih bur hi thil àwm tak a nih rualin, thil buaithlak leh harsa tak a ni ve bawk tih hriat a ṭha.

Zo hnahthlak Myanmar khua leh tui, Mizorama awmte hi raltlan an ni emaw, ni lo emaw, mumal taka chhinchhiah a ṭul tak zet. Raltlante sorkarin temporary identity card siamsak a tum pawh hi a pawimawh tak zet a, tihhlawhtlin vat a nih theih nan thuneitute'n khawmuang loin theihtawp chhuah rawh se.