NG awmna sawn a ṭul rêng em?

Mizoram Journalists' Association leh Directorate of Information & Public Relations chuan June 23, 2025 khan IPR Auditorium-ah Media Workshop an buatsaih.

Workshop-ah hian Mizo Language Development Board Chairman chuan, Mizo ṭawnga hawrawp 'NG' awmna chu sawnin, 'N' leh 'O' inkarah awm tura ruahman a nih thu a sawi. NG awmna sawn ṭha an tih chhan ber chu, computer leh Excel velah Mizo hawrawp bik indawt dan a dik theih loh vang a nih thu a sawi bawk.

Mizo Language Development Board hi state sorkarin dan hmanga din niin, Mizo ṭawng chungchanga thuneihna sang tak nei a ni a; Mizo ṭawnga siam rem ngai te, ṭawng chungchanga thu inchuhte chingfel thei tura din a ni.

Mizo ṭawng chungchanga thuneihna sang tak nei ni mah se, hma an laknaah MLDB hi an fimkhur viau a ṭul. Mizo mipui nâwlpui rilru sûkthlêk uluk taka thlir chungin, ram leh hnam tana ṭha ber tur an ngaihtuah tur a ni a; hawrawp awmna sawn phei chu thil lian tham lutuk a nih avangin fimkhur lehzual a ngai.

NG awmna sawn chungchangah hian uluk taka ngaihtuah a, mipui náwlpui sûkthlêk thlir tel a ṭha a; Language Development Board-in NG awmna sawn ṭul an tih chhan hi chhan tling tak a ni chiah em tih uluk taka ngaihtuah a ṭul.

Hawrawp la nei ngai lo, hawrawp nei thar tur ni ila chuan N dawta NG dah hi a àwm viauah a ngaih theih. Mahse, kum za chuang fê hawrawp lo nei tawh kan nih avang leh tuna kan hman dan hi Mizo mipuiin an ṭhan hnan tawh a nih avangin NG awmna hi sawn kher a ṭul loah a ngaih thei ve bawk.

Hawrawp awmna sawn tur hian eng nge sawn a ṭulna tih te, tuna hawrawp awmna avanga harsatna te, hawrawp awmna sawnin a ṭha zawng leh a chhe zawnga nghawng a neih tur te, sawn a nih avanga a hlâwkna leh a ṭangkai zawkna turte leh harsatna awm theite uluk lehzuala ngaihtuah a ṭul.

Mizo ṭawng sawi leh ziahah NG hi tuna a awmna avangin Mizote'n harsatna kan tawh phah lo tih a chiang a; computer software ṭhenkhat vang maia sawn hi thil dik leh ṭha zawk tur a ni chiah em tih hi a pawimawh.

Mizo Language Development Board hian NG awmna sawn an tum hi uluk lehzualin ngaihtuah se; Mizo mipui tam berin an pawmpui theih hauh loh tur thutlukna siam loh a himin a rinawm.