Ṭanpui ngai mi mangang

Mi mangang leh rilru lam natna tuarte tana pan tur, Mapuia Crisis Centre (MCC), Chanmari chu tun hnai khan an hawng a, he hmun hi mi mangang leh ṭanpui ngai, mahni intihhlum duhna khawp hial neia rilru mangangte ṭanpuina hmun tura din a ni.

Mizoramah hian mahni intihlum hi kum tinin an pung emaw tih mai tur a ni a, tun hnaia sorkar record-a lang chin ringawt pawh a tam tham hle. Ruihhlo avang te, mipa leh hmeichhe inkar thil avang te, sum leh paia harsatna avang te, eizawnna kawnga buaina avang te, hrisel lohna thil avangte leh chhan hrang hrang avanga mahni intihlum duh hial khawpa rilru buai leh mangang hi mi tam tak an awm.

Heng mite harsatna hi a taka tawng ve lo tan chuan hriat ve theih pawh a ni mang lo a; nimahsela mipui nawlpuiin kan hriat si loh hian mi mangang leh lungai, nun rûm mek hi mi tam tak an awm. Heng mite mamawh chu an harsatna lo hriatthiampuia chhanchhuahna kawng kawhhmuh theitu an ni a, sorkar, kohhran leh pawl pawhin ṭan an la nasa ve ta hle.

Sorkar damdawi-ina psy-chiatry department-te pawh an lûn hle tawh a, kohhran lam pawhin councelling centre-te an din a, NGO an pen chhuak a, ṭanpui ngaite leh mi mangangte chhanchhuah duhtu mi ṭhahnem ngai an pung zel.

Mizo zinga har-satna awm theia kan ngaih loh harsatna mak tak tak hi kan tawk mek zel a, heng mite tana tluk luhna tur hmun a awm belh zel hi a lawmawm a; rilru natna nei leh ṭanpui ngaite hi a hun taka puihna an dawn chuan tihdama chhanchhuah theih an ni a, mi dangte puih duhtu an pung zel hi a lawmawm takzet a ni.