Sorkar leh YMA

Chief minister Lal Thanhawla chuan, YMA hmalakna zarah eirawngbawlna gas-in ziaawm lam a pan mek niin a sawi a, "Gas thlen ṭhat leh ṭhat lohah sorkar ang chuan hmalak a harsa," a ti a; an hmalaknaah sorkar a lawm thu a sawi bawk.

Tun hnaia eirawngbawlna gas tihchingpen chhui chhuahna kawnga YMA hmalaknain fak a hlawh a, an hnathawh hian nakin zelah nghawng ṭha tak a nei ngei dawn niin a lang. Hei vang hian chief minister meuh pawhin YMA chungah lawmthu a sawi a, sorkarin YMA chu an thlawp tlat thu a sawi.

Tun hnaia ei-rawng--bawlna gas chungchanga YMA leh sorkar thawhho dan hian Mizorama thil kalphung ṭhenkhata sorkar leh NGO dinhmun a pho chhuak angin a ngaih theih. Sorkar chuan eirawngbawlna gas tihchingpen hi a chhui chhuak tur a ni a, a dik lo an awm chuan hrem turin a nawr tur a ni a, tuna YMA tih zawng hi sorkar tan tih theih loh tur a awm lo. Sorkar a pen chhuah miau loh avangin YMA a pen chhuak a, a tawpah sorkarin YMA a thlawp thu a chhuah leh ta mai niin a lang.

Mizoram kalphungah hian NGO leh kohhrante hi an pawi-mawh a, kan state khai dingtu
ṭangkai an nih bakah state dang tih theih loh thil ṭha tam tak hi anmahni kal tlanga kan hmuh a ni. Hetihlai hian sorkar berin NGO-te a dah pawimawh a, a titu tur zawk a thlawptua an indah daih zel a nih chuan ram kalphung atan a fel lo thei ang.

Chutiang bawkin YMA tan pawh eirawngbawlna gas chung-changah ni lo, thil danga sorkar nen an inngheng hnai lutuk a nih chuan a fuh ber chuang lo a; sorkar khak a ngaih hun leh nawr a ngaih hunah YMA hi sorkara inhnimphum thuk lutuk chuan a
ṭangkai tur angin a
ṭangkai tawk thei lo a, chumi piah lamah YMA hruaitute sorkar hnathawk an nih phei chuan sorkar kalh zawnga kal a ṭul hunah an pen chhuak thei lo ang tih a hlauhawm.

YMA leh sorkar hi inthlawp tawnin ram tan ṭha takin ke pen zel se; amaherawhchu sorkarin a tih tur tiin YMA kutah innghat vek tawh lo se, tunah hi chuan sorkar chak lohnaah YMA-in ke a pen a, sorkar zawkin thiam takin a thawp thu an sawi lêt leh hlauh hi a ang ṭhin. YMA leh sorkar thawhhona hi ṭha se, inkawp chintawk leh inhnaih chintawk erawh an hriat a ṭha a, fimkhur taka ke pen hunlai a nih hmel.