Kan college neihte hi

Chief minister Lal Thanhawla chuan, T Romana College building thar lungphùm a phúm ṭumin, "Sorkarin college-te'n infrastructure ṭha an neih a ngai pawimawh a, hemi atan hian RUSA hi ṭangkai leh ṭha zawka hman tum a ni," a ti a; agency hrang hrang aṭangin a theih ang angin sum dap mek a nih thu a sawi.

Mizorama college hrang hrangte hmunhma hi en ila Aizawl khawpuia college-te hian hmunhma an nei chhe hle mai a, zirna in atana hman âwm loh tak takah tawt takin an awm mek a ni. Hei hi tun hmaa plan fel tak neih loh vang a ni ber a, chumi piah lamah zirna hi khawpui liana kalpui vek tumna rilru kan put len vang a ni thei bawk.

Tun hnaiah Aizawl khawpui chhunga college-ah admission hmuh a harsa hle mai a, tawt chung chungin an inbeng. Hetihlai hian Aizawl khaw pawn khawpui danga college hmunhma nei ṭha zawkahte zirlai an thawl a, hei hian kan ram inrelbawlna dinhmun pawh a hril chiang hle a ni.

College zirtirtu chin chu zirna lamah pawh sang tak vek an ni tawh a, khawi khuaah pawh hna thawk se zirtirna ṭha tak pe thei tura beisei an ni. Heti chunga Aizawl khaw pawn college-a kal kan la hreh tlatte hi inennawn a ngai a, khaw dang college zirtirtute an ṭan a ngai a, chumi piah lamah sorkar pawhin ngaihtuahna a sen deuh a ngai a ni.

Aizawl khaw-puiah hian college pakhat lo hi chu zirlaite tana han kalna tlak hmunhma nei pawh an awm meuh lo a, infiamna hmun chu sawi loh chawlh laia han
ṭhut hahchawlhna tur takngial pawh nei lo college an ni hlawm. Hei vang hian college hmunhma ṭha mamawhna a sang a, thuneitu lamin college hmunhma ṭha an ngaihtuah rual hian Aizawl khawpui pawna zirlaite’n zirna an chhunzawm duhna turin zirna ṭha taka kalpui dan tur sorkarin a ngaihtuah tel a ngai.