Sikul kal dana rawtna hun hawn

School Education department chuan June 20, 2025 khan hriattirna tichhuakin, Mizorama sikul kai hun chhung, school calendar leh uniform inang tlang (common school uniform) hman mek chungchangah rawtna thehluh theih a nih thu an tarlang.

School Education department-in sikul kai hun, calendar leh uniform chungchanga ngaihtuahna thar an nei hi a lawmawm. Zirna hi chhungkaw tin nghawng a ni a; sikul leh zirlaite kaihhnawih thil chi thumah hian a ngai anga kal a ni emaw, tihdanglam a ni emaw pawh ni se, ram leh mipui náwlpui tana ṭha ber turin School Education-in thutlukna an siam a pawimawh.

Sikul kai hun chhung, school calendar leh school uniform chungchangah mipui náwlpui tana ṭha ber tur duang chhuak a, thutlukna ṭha siam turin zau zawka ngaihdan lak a ṭha a; chutiang tura School Education-in a duh apiang tana rawtna thehluh theih an ti hi a ṭha hle. Ngaihdan neite chuan hun hawn chhungin rawtna thlen ngei ila a ṭha.

School calendar leh uniform leh sikul kai hun chhung chungchangah state sorkarin a duh chuan amahin thutlukna a siam thei a, tun hma pawhin thutlukna a lo siam tawh ṭhin. Congress sorkar laiin sikul ṭan hun tihhma a ni a, mahse, a hnua MNF sorkarin sikul ṭan hun a titlai leh a, sorkar sikulah uniform rawng inang tlang hman turin a ti bawk. ZPM sorkar pawhin a duh chuan thutlukna a siam thei ve tho a, mahse, mahnia thutlukna siam mai lo a, mipui ngaihdan a la hi a ṭha hle.

Sikul kai hun tihhma hi thil ṭha tak a ni a, Mizo hnam kal zel tur thlirin hmasawnna thlentu a nih a rinawm; chutih rualin, mi ṭhenkhat tan harsatna thlentu a ni thei bawk. Sorkar sikula zirlaite uniform inang tlang hi a ṭhatna a awm rualin, a ṭhat lohna a awm thei. School calendar pawh tun hma aṭangin thlak kual a lo ni tawh ṭhin.

Mihring kan thuhmun lo a, kan awlsamnate leh harsatnate pawh a inang lo. Sikul leh zirlaite kaihhnawih thil chi thumah pawh hian ngaihdan leh duh dan a inang dawn lo. Ngaihdan leh duh dan inang lo karah, mi tam zawk duh dan thlir chung leh mipui rilru sûkthlêk thlir chungin, ram leh mipui tana ṭha ber turin hmalak zui ni se; zirna lama ram leh hnam tana ṭha zawk turah chuan huaisen taka kala hmalak ni rawh se.