Sorkar tlin lohna mipui phurrit

Land Revenue & Settlement (LRS) department chuan, sorkar kum liam ta 2015-16 chhung khan HPC(D) demand area huam chhungah leiman an khawn ngam lo. Leiman khawn ngam loh chhan chu, police-te'n venhimna an pek theih loh avanga thawktute an kal ngam loh vang a ni tih RTI Act hmanga zawhna channaah an tarlang. Kum 2015-16 atana leiman an khawn loh hi kum 2016-17 atana leiman khawn ruala khawn an tum niin an sawi.

HPC(D) demand area huam chhunga leiman khawn loh chhan hi police lamin venhimna an pek theih loh vang a nih tak tak chuan a fel lo hle mai. Mizoram chhunga leiman khawn ngam lohna hmun a awm a nih chuan sorkarin rang takin a ngaihven tur a ni a, chutah leiman khawntute’n venhimna an mamawh ang pawh pe thei lotu sorkar neih chu mipuite tan chuan a hrilhhaithlak takzet a ni.

Tuna a lan dan hi chuan kum 2015-16 chhunga leiman an khawn loh hi kum 2016-17 nen khawn kawp an tum dawn a nih hmel a, mipui tan chuan a hautak khawp ang. Zep thu a cheng lo, heng HPC(D) demand area huam chhung hi thingtlang khua deuh vek a ni a, sum leh paia an harsat dan tur pawh hriat sa vek a ni. Hetihlaia kum hnih chhung leiman ṭum khata pek hi chu an tan thil harsa tak a ni dawn.

HPC(D) demand area huam chhunga chengte’n leiman a hlawma an pek a ṭul chhan hi RTI Act-a tarlan ang hi a nih chuan sorkar thiam loh vang a ni. Mahni hnathawktu, leiman khawntu tur lehnghal pawh venhimna pe thei lo sorkar kan lo nei reng a nih chuan mipui tan chuan rin ngam an harsa hle ang. Engpawhnise HPC(D) demand area huam chhunga chengte leiman pek dan tur hi mipui tana phurrit lo thei ang bera ngaihtuah ni se, a hlawma kum hnih leiman pek hi a hautak hmel avangin sorkar hian ruahmanna fel tak siam se, mipuite tana remchang hi thlirpui ngei rawh se.