ILP dik taka kenkawh a ṭul

Chief Minister-in June 25, 2025-a Samvidhan Hatya Diwas hmannaah sorkarin khauh zawkin Inner Line Permit a kalpui dawn thu leh, dan loa Mizorama lo lutte leh hnam dang, ILP thih tawh hnua Mizorama la awm chhunzawm zelte dap chhuah hna ṭan a nih dawn thu a sawi.

Hnam dang, a bikin tribal ni lote Mizorama lut turin ILP neih a ngai ṭhin a, ILP hi Mizote inhumhimna pawimawh taka ngaih a ni. Mizo hnam inhumhimna pawimawh berte zinga mi a nih angin ILP hi dik taka kalpui a, a nih dan tur ang taka kenkawh a ngai.

Mizoramah hnam dang, tribal ni lo an tamzia kan hria a, a bikin Aizawl leh khawpuiah an tam zual. Mizorama hnam dangte zingah dan ang taka ILP nei an awm rualin, ILP nei lo te, ILP nung tawh lo leh ILP anga an awm chhan ang ni loa awm zui ta zel tam tak an awm ang tih hi rinhlelh rual a ni lo.

ILP hi sorkarin a kengkawh ṭha tawk lo ṭhin a, chuvang chuan hmang dik lo an tam phah niin a lang. YMA leh zirlai pawl lamin an rilrua a lan chángin Mizorama dan loa hnam dang awmte leh ILP nei loa awmte an vâi ṭhin a, hma an lak apiangin dan loa awm mi tam tham tak an hmu chhuak ṭhin.

YMA leh zirlai pawlte hmalaknate hi a ṭangkai em em a, mahse, dik taka ILP kengkawhtu tur thuneitu dik tak an nih loh avangin an tan hmalak reng a harsa. Thuneitu leh mawhphurtu dik tak sorkarin dan ang taka hma a lak a, dik taka ILP a kenkawh a pawimawh ber.

Sorkarin khauh zawkin ILP a kalpui dawn thu te, dan loa Mizorama lo lutte leh hnam dang zingah ILP thih tawh hnua Mizorama la awm chhunzawm zelte dap chhuah hna ṭan a nih dawn thute Chief Minister-in a sawi hi a lawmawm a; sawi ringawtah tàwp loin, a tak takin, chak takin bawhzui ngei rawh se.

ILP khauh zawka kenkawhna turah khauh taka kal an duh avangin lo hrethiam turin Union Home Minister a ngen a, Union Home Minister pawhin, 'A ṭha, ti rawh' tiin a lo chháng niin CM-in a sawi. Hetiang a nih phei chuan dik tak leh khauh taka ILP kenkawhnaah harsatna a awm lo tura ngaih theih a ni a; sorkar hian inthlahrung hauh loin chak takin hma an la teh se.