LPG dan zawm ṭhat a pawimawh

Food, Civil Supplies & Consumer Affairs department chuan, Marketing Discipline Guidelines-in a phût angin, eirawngbawlna gas sem dawnah bûk leh ngei ngei tur a ni tih an tarlang.

FCSCA tarlan dan chuan, gas distributor-te'n gas an pek chhuah/sem dawnah gas bûr bûk dik tak chauh an phur chhuak tur a ni a; gas an sem/peknaah bûkna an keng tur a ni a, customer hnena gas an pek tur chu consumer hmuh lai ngeiin a dik leh dik loh bûk leh tur a ni. Hei hi zâwm ngei turin gas distributor-te hriattir an ni bawk.

Mizoramah nunphung pangngai a nih a, kawngah harsatna a awm loh chuan eirawngbawlna gas-ah harsatna lian sawi tur awm lêm lo. Chutih rualin, gas hnianghnar tak erawh kan ni lo a; chuvang chuan, mipui (consumer) lam hian dan/inkaihhruaina ang taka kal hi kan tlin lo ṭhin niin a lang.

Gas kan hnianghnâr loh avangin mipui lam hian danin a sawi ang taka thil tih kan beiseiin kan phût duh lêm lo a; gas kan lak/dawn theih chuan kan lawm tâwk ṭhin a, gas kan dawn chu a bûk dik tak a nih leh nih loh enfiah kher kan phût loh phah ṭhin a ni. Hei hian gas agency/distributor-te a tihuangtau a, gas bûk tling lo a tam phah ṭhin.

Ni tin mamawh chungchangah hian mipui hi kan harh a ngai a, kan chanvo hi a nihna anga kan phût ngam a ṭha. Gas bûk chungchangah pawh hun tlemtê sên belh a ngai a nih pawhin kan huama kan nghah peih a ngai.

Gas bûr kan lak tur kan hmuh lai ngeia bûk tura tih hi ti ngei tura phût nacháng kan hriat a ṭul a; kan phût a, kan tihtir chat chat zel a nih chuan nakin zela kalphung dika kan kal theihna tur a ni.

Eirawngbawlna gas chungchanga dan leh inkaihhruainain a sawite hi mipui lamin phût nachâng an lo hre lo a nih pawhin, distributor lam hian dik taka kenkawh an tum tur a ni a; kaihhruaina ang taka kal hi an tih tur a ni tih hria se a ṭha hle. Gas bûk zel hi distributor-te tana hna chuangliam ni loin, tih ngei tur a ni tih an pawm a ṭul a, an tih ngei a ngai bawk.