Remna Nía inhnialna tawp tawh se

Vawiin June 30 hi Remna Ní a ni a, India sorkar leh Mizoram independence puangtu MNF ten inremna thuthlung an ziah champha a ni. Hun eng emaw ti aṭang khan mi ṭhenkhatin Remna Ni hi inhnialna ní atan an hmang ṭhin a, mahse, awmze nei loa inhnialna a ni.

March 1, 1966 aṭangin Mizoramin hun thim tak a tawng chho a, kum 20 chhung Mizoram mipui zalen lo takin, hrehawm takin an awm a, tuboh leh dolung inkarah an awm a ni ber. Mipui nun an chêp em em a, mi tam tak an thih phah a, mi tam tak hliam na tak tuara ramtuileiloa awmte pawh an awm phaha sawi a ni. Mizo mipui tawrhna rapthlak tak takte kha sawi sên a ni lo.

Kum 20 chhung hrehawm taka awm tawh hnua June 30, 1986-a remna thuthlung ziah a nih tâk avanga Mizoram mipui hlimzia kha ṭhangtharte chuan kan hrethiam pha kher lo ang. Mizoram chanchinah June 30, 1986 zan khan Mizoram mipui a náwlpuiah an hlim leh lawm ber zan a ni hialin a rinawm.

Mizoram buai aṭang hian inrem lohnain a hrin chhuah rapthlakzia leh hrehawmzia kan hmu thiam tur a ni a, hre turin kan ngaihtuah ve tur a ni. Rambuai lai leh remna thuthlung ziah hnua Mizoram innawm hleihzia kan hria; chuvangin, Mizoramin remna leh muanna a neih mek hi a chhiat kan remti tur a ni lo a, remna leh muanna tiderthâwng thei zawnga chêtnate chu kan dodal tlang tur a ni.

India sorkar leh MNF inrem theihna tura beitute an fakawm tak zet a; a bik takin kohhran hruaitute leh zirlai pawl lamin an thawh hlâwk hlea sawi a ni. Politician leh ram hruaitu zingah thawh hlâwk bik an awma sawi a ni bawk. Kan ramin remna leh muanna a neih theihna tura beitu zawng zawngte an chhuanawm vek mai.

Politics avangin rambuai chungchang leh remna thuthlung ziah chungchangah inhnialna a awm ṭhin a; a zialo tak zet. Rambuai chungchang leh inremna ziah chungchang hi hun kal tawh, kan tihdanglam theih tawh loh a ni a, politics-a ngaihdan inan loh vanga tun hnua lo inhnial ṭhin hi awmze nei lo a ni.

Remni Ni hi inhnialna ní ni loin, inremna ní ni zel se, rambuai leh inremna thuthlung chungchanga inhnial ṭhin hi awmze nei lo a ni a, tàwp tawh rawh se.