Halpuah khap leh hremna

Krismas leh Kumthar vuakvetah sorkarin halpuah leh halmawi a khap bakah sky lantern kah chhuahte a khap a, dan bawhchhiate chu hrem theih an ni. Kum dangah pawh sorkarin halpuah leh halmawi chi hrang hrang bakah naupang silai a mu kap chhuak thei chite a lo khap tawh ṭhin.

Halpuah leh halmawi khap hi thawk khatlai khan a hlawhtling hle a, Mizoramah a zuar hmuh tur pawh an awm mang lo hman hial a; a ram puma halpuah ri hriat miah loa kumhlui thlah zan hman ṭumte pawh a awm hial a ni.

Chhan hrang hrang avangin halpuah khap hian zawm a hlawh lo chho tawlh tawlh a, ṭun hnaiah phei chuan kum hlui thlah zanah Aizawl khawpuiah chuan halpuah leh halmawi khap loh ang maiin an hal nasa leh ṭan ta. A hal luite an man emaw, pawisa an chawitir emaw hriat tur a awm mumal ngai lo a, an hal thawm erawh chiang taka hriat ṭhin a ni. 

Hetiang thilah hian a hal luitu mipui lam hi an demawm a, chutiang tluk tho chuan a hal luite en liam mai mai tura thuchhuahtute pawh an demawm tel bawk.

Sorkar tán thuchhuah hi rûn dala tih ve mai mai a awm a, bawhzui tum tak taka thuchhuah siam pawh a awm bawk - a khawi zawk rilru pu hian nge sorkarin ṭhu a chhuah tih chu halpuah leh halmawi hal luitute chunga a chet danah a lang mai dâwn a ni.