AMC-in a thupek zûk mai lo se
June 21, 2025 (Inrinni) khan Aizawl Tennis Court leh Horticulture Directorate bul kawngpuia thil zuarte chu AMC-in an thil zawrhte an khawmsak a; thil zuartute chu lungawi loin kawngpui an dang.
June 28 (Inrinni)-a thil zawrh tuma June 27 zana inchhawpte chu AMC leh Police lamin dangin, an bungruate AMC Multi Complex-ah an dahsak a; mahse, Inrinni-ah erawh chuan zing aṭangin thil zawrh tumte chuan an bungruate la chhuakin an zuar leh ta tho.
AMC hian May 8, 2025 khan Mizoram Legislative Assembly building leh a chhehvel chu Mizoram Municipalities Act, 2007 Section 308 hmangin thil zawrh khapna hmunah a lo puang tawh a ni.
Inrinnia Aizawl Tennis Court leh Horticulture Directorate bul kawngpui kama thil zawrh chungchangah hian, ṭhenkhatin AMC-in thupek a chhuah hi khawng taka kenkawh ṭha an ti ang a, ṭhenkhatin Inrinni na nâ nâ chu zawrh phalsak mai ṭha an ti bawk ang.
Mizote hi Inrinnia chhungkaw mamawh lei khawm ṭhin kan ni a, hei hi kan la ching chhunzawm zelin a rinawm. Chuvangin, chawhmeh leh thil dangte awlsam taka lam khawmna tur hmun ṭha leh tam zawk a awm a pawimawh.
Chutih rualin, hmun remchang apianga thil zawrh zel erawh a dik lo a; a àwm tâwk leh chin tâwk a awm ngei a ngai. Khawi bazarah pawh ni se, thil zuar duh zawng zawngte inzawrhna tur hi ngaihtuahsak vek sên a ni lo; reh bun chin a awm a ngai a, thil zuar thei lo chin an awm a ngai.
Treasury Square, Aizawl Tennis Court leh a chhehvel hi state-a lal ber awmna Raj Bhavan leh rorelna hmun sang ber Assembly House bakah, sorkar hmun pawimawh chi hrang hrang awmna a ni a; hmun dang nen tehkhin a rem lo. Hmun pawimawh lai a nih avangin thianghlim leh fai taka enkawl a pawimawh.
Hei vang hian Aizawl Tennis Court leh a chhehvel kawngpui kama AMC thil zawrh a khap hi tih âwm tak a ni a; khapna thupek zâwm duh loa zuar lui an awm tawh loh nan khawng lehzuala hmalak a ngai a ni. A ṭul angin hremna tak tak lek hreh loh ni se a ṭhain a rinawm.
AMC hian kawngpui kama thlai leh thil dangte zawrh a khapnaah hian a thu hi zûk mai lo se, huaisen tak leh khawng zawkin dan leh thupek kengkawh rawh se. State sorkar lam pawhin a ṭul angin pui se a ṭha hle ang.