Qualify lote chawlhtir ni rawh se
Mizo Students Union chuan sorkar enkawl college hrang hranga qualification-a tling lo part time assistant professor mi 29-te thawh hun pawh sei an duh lohzia lantir nan July 1, 2025 khan Higher & Technical Education Directorate kawtah notification an hâl.
MSU hian qualification-a tling lo part time assistant professor mi 29-te thawh hun pawh seina sût turin sorkar an ngen nawn. An ngenna chu July 6, 2025 ral hmaa tihhlawhtlin a nih loh chuan Aizawlah kawngzawh huaihawt an tum a, kawngzawhin awmzia a neih loh chuan hmalak zel an tum thu an puang bawk.
Mizoram University Research Scholars’ Association pawhin June 13, 2024 khan HTE Minister hnenah Mizorama college zirtirtu zinga qualification neih ngai nei lote chu Mizorama zirna tihniamtu an nih thu leh, thiamna/degree neite chanvo chhuhsakna a nih thu an lo thlen tawh.
Part time assistant professor-te February 28, 2025 thlenga chhawr zuina tura August 9, 2024-a sorkarin hriattirna a chhuahah February 28, 2025 hnu lamah chuan chhawr hun chhung pawh sei a nih loh tur thu ziah a ni. Mahse, HTE department-in February 21, 2025-a notification a tihchhuahah chuan college zirtirtu qualify lote thawh hun pawh sei a ni leh si.
College zirtirtu ni thei chin an awm a, chutiang ni lote sorkarin hun rei tak a chhawr reng hi dan bawhchhiatna dik tak a ni a, sorkar mualphona a ni. College zirtirtu ni tura thiamna nei mi tam tak an awm tawh a, chung mite dikna chanvo rahbehna a ni bawk.
Tling lo chunga mi tute emaw sorkar hna thawhtir reng hian Mizo ṭhalaite a tihnual ṭhin a; ṭhalaite leh mipui rilru sûkthlêk (moral) dik lo a neihtir thei bawk. Mizo mipui rilru sûkthlêk siam dik a ngaihzia sawi a ni fo a, sorkar hotute pawhin an sawi ṭhin. Mipui, ṭhalaite rilru sûkthlêk a dik theih nan sorkar hotute'n mawhphurhna sang tak an nei a ni.
College zirtirtu ni tura thiamna leh degree neih ngai nei lote sorkarin college zirtirtu atan a chhawr reng hi a dik lo tak zet. Sorkar hian zirlai pawlte phût ang leh research scholar-te beisei ang hian, college zirtirtu ni tura thiamna/degree neih ngei nei lote hi sorkar hian chawlhtir tawh rawh se.