Khawtlang rálmuanna tura thawhho

Chief Minister chuan July 3, 2025-a Aizawl City Local Council Association (ACLCA) hruaitute nen an inkawmnaah, Aizawl a rálmuan theih nan khawlaia insual rawn chíngte tihtawp a ngaih thu a sawi a; local council tinte chu an huam chhung ṭheuhah tlawmngai pawlte nen ṭang tlanga khawtlang rálmuanna atana hma la turin a ngen.

CM hian Aizawl chu hmun rálmuanga siam a ṭul thu a sawi a, "Tleirawl rual, mi dang sual rawn chíngte an awm niin a hriat a, heng mite hi tihtawp hmiah a ngai... Kan khawlai hi zu rûi emaw, buaina siam chingte emaw lakah fihlim se, nunau leh hmeichhe tan pawha hmun ralmuang taka kan siam a ngai," a ti.

Social media a chak tawh a, mi tin maiin smart phone kan kawl tawh; thil thleng hrang hrang, a lian a têin social media-ah a darh zung zung tawh. Khawi emaw laia mi sual rawn emaw, kut inthlak rawn video-te a darh leh hluai ṭhin.

Mi sual rawn leh kut inthlak rawn hi mi huaisen zia a ni lo a, rilru têt vang, ât vang leh mâwl vang a ni tlangpui. Tun hnai kum hmasa lamah kut inthlak rawn vanga thihna hial thlengte a awm a; a zialo tak zet a ni.

Chief Minister-in a ngen ang hian, local council leh village council tin hian an khua/veng chhung ṭheuh uluk lehzualin enkawl se, khawtlang rálmuanna turin ṭan la lehzual se a duhawm. Khawtlangah hnawksak bik te, mi kutthlak chíng leh mi sual rawn ching te, khawtlang rálmuanna tiderthâwng theite an awm leh awm lohte uluk taka ngaihvenin hma la se, khawtlang a rálmuan phah ngei ang.

VC leh LC member-te hi khua leh veng tinah mi tlemtê an ni a, anmahni chauh chuan sual dona leh khawtlang ralmuanna tura hmalaknaah thui tak kal a harsa ṭhin a; tlawmngai pawl dangte leh mipuiin ṭawiawm ṭhat a ṭul.

Kan khawtlang ṭheuh hi kut inthlak leh pawi khawih hluarna hmun, nunau tana hmun rálṭi leh hrehawmah a chan kan phal tur a ni lo. Khawtlang a rálmuan neih theih nan LC/VC bakah, tlawmngai pawlte leh mipuiin mawhphurhna kan nei ṭheuh mai. Kan khawtlang ṭheuh a rálmuan theih nan ṭanrual a, thawhhona ṭha neih a ngai a ni.