Kan ruihhlo do dan hi

Central YMA hruaitute chuan tun hnai khan Raj Bhavan-ah Governor PS Sreedharan Pillai an kâwm a; ruihhlo do kawnga Central YMA thawhpui tur leh a ṭul anga pui turin an sáwm. 

Mizorama kan harsatna tawh lian tak pakhat chu ruihhlo hluar zel hi a ni a, hei hian kan ṭhalai nun a tichhe nasa hle. Chhungkua a keh chhia a, fahrah tam tak a siam a, mi tam takin nun an chân bawk. He ruihhlo kan do dan hi kan ennawn a, ngaihtuahna thar kan siam a ngai ta hle. 

Tunah hi chuan sorkarin ruihhlo a do a, tlawmngai pawlin a do a, kohhranin a do bawk a, kan zavaiin kan do kan ti a, ruihhlo erawh a hluar zual zel. Hei vang tak hian kan ruihhlo do dan hi tun aia ṭha (effective) zawka kan beih a ngai a, chumi tur chuan kawng hrang hrang kan dap a ṭul reng a ni. 

CYMA lamin ruihhlo do kawnga thawhpui atana Larsap an sawm hi a lawmawm a, a theihna zawnah theihtawp a chhuah phawt chuan thui takin kawngro a su thei ngei ang. Tunah hi chuan kan ramriah harsa lo takin ruihhlo phurh luh theih a ni a, kan khawlaiah ruihhlo a zalen a, kan ṭhalaite suattu ruihhlo zuarte meuh pawh mi tam tak chuan kan en liam ta mai mai niin a lang. Tuna kan kal­phung piah lama ruihhlo hi kan do a nih loh chuan kan hmalam hun hi a thim tih loh rual a ni lo. Chuvangin, CYMA hian ngaihtuahna zau zawk nen theihtawp chhuah zui zel se, ruihhlo do kawngah hian a zau thei ang thawhpuiah sàwm zel rawh se.