Sumdawngte leh mipui

Sorkar laipui chuan India tangka cheng 500 leh cheng 1000 note chu a tithi thut a, India rama mipui tam takin harsatna an tawk mek. Sorkar leh bank hotute chuan mipuite chiai lo tura an chah bakah December 30 thleng pawisa thi ta hi thleng theihna remchang an siam tur thu an puang a, heti chung hian sumdawng tam tak chuan heng pawisa tihthih takte hi an dawng duh tawh lo.

Pawisa thi hian mipui nawlpui a nghawng vek dawn avangin mipui an mangang a, an chiai deuh pawhin a mak lo. Thiltithei zawkte ṭhuthmun aṭanga, "Lo chiai suh u," in tih ringawt hian awmzia a nei thui lo a, mipui nawlpuiin an dawr ṭhin dawr ṭhenkhatin heng pawisate hi an dawng duh tawh lo a, bazara chawhmeh leina leh nitin mamawh lamna hmun tam takah Rs 500 leh Rs 1000 note hi an dawng duh tawh lo.

Tuna ruahmanna awm danah hi chuan sumdawng tan hi chuan pawisa dawn duh loh tur a niin a lang lo a, pawisa hi bank-ah an dah lut leh thei mai a, anni tan bank dawr hi thil harsa a ni lo. Mipui nawlpui tan erawh bank dawr hi a awlsam lo a, bank account nei miah lo, pawisa kawl tlat site pawh mi ṭhahnem tak an awm ang. Heng mite hian pawisa thleng hi an thiam loin harsa an ti dawn a, an tana pawisa hmanna tur dawr lamin an dawn duh bawk si loh chuan mipui tan chuan thil buaithlak tak a ni ang.

Dawrkai tê deuh leh bank dawr ṭhang lote chuan pawisa hi an lo dawng ngam lo a nih pawhin a la hriatthiam theih a, chutiang mi ni ve lem lo, dawr lian leh changtlung zawk, bank pawh dawr ṭhang tan chuan Rs 500 leh Rs 1000 dawn hi a hlauhawm lo a, tunah phei chuan mipui tana remchanna siamsakna a ni hial ang. Hetiang hun danglam bik hi a thleng zen zen lo a, heng hunah hian kan mizia leh kan nihna a lang ṭhin a, midangte tana inpe leh inphal sumdawng hi kan mamawh a, sumdawngte hian mipui tana awlsamna turin Rs 500 leh Rs 1000 note hi la dawng zel se la, mipuiin he pawisa tihthih tak hi an tuar nep deuh ang.