Mizo thei hmanga fruit beer siam
Mizorama zu khapna dan hman mek 'The Mizoram Liquor (Prohibition) Amendment Act, 2025' hnuaiah Mizorama thlai leh thei tharte hmanga fruit beer siam phal a ni dawn tih Excise & Narcotics department hotute'n tun hnaiah media mite hnenah an sawi.
Excise & Narcotics hotute sawi danin, MLP Amendment Act, 2025 hnuaiah Mizorama thar sawhthing, balhla, dragon fruit, sapthei, lakhuihthei, sunhlu, kawlthei, theiherâwt, fu, lamkhuang, dawnfawh, hmazil leh thei/thlai dangte hmanga fruit beer siam theih a ni dawn a; chutiang tur chuan dan (rules) an siam zo tawh a, Legislative Assembly-in a pawmpui a la ngai.
Mizo thlai leh thei tharte tam tak hi tuna kan ei leh sâwngbâwl dan angah chuan a thartute'n hlâwkna hmu ve bawk mah se, dinchhuahpuina tak tak tur chuan a la harsa. Khaw ṭhenkhat, thlai leh thei eng emaw thar tam deuhte an han awm a, a hralhna lamah harsatna an tâwk ṭhin; tunah pawh harsatna tâwk mek an awm.
Tuna kan kalpui dan ang ngawt ni lo deuh, kut hnathawktute'n tun aia an hlâwkpui dan tur leh, an thar ang angte an hralh vek theih dan tur ngaihtuah a ṭul a; chumi atan chuan wine emaw, fruit beer emawa siam theih hi a ṭha hle dawn a ni.
Mizorama thar thlai leh thei chi hrang hrang hmanga fruit beer siam a nih theihna tura sorkarin dan a her rem hi a ṭha hle mai a, a lawmawm. Kut hnathawktute'n an thawhrimna aṭanga hlâwkna sang zawk an hmuh phahna leh, an hlimna leh lawmna thlentu a nih ngei a rinawm.
Kan rama thlai leh thei thar hmanga fruit beer siam theihna tur dan duan hi sorkarin tihlawhtling ngei se, kut hnathawktu tam takte nghahhlelh a nih avangin a hlawhtlin theih nan chak takin han bawhzui teh se.
Hetih lai hian, dan hrûlah dan loa thil tih tum an awm ṭhin; fruit beer siam chungchangah pawh dan anga thil ti lo leh, phalna pawh nei loa lo siam ve ngawt an la awmin a rinawm. Siam phalna mumal tak uluk taka pek ni se, siam phalna nei lote'n an lo siam ve ngawt loh nan ṭha taka dan kenkawh a ṭul ang.
Mihring hriselna atana ṭha lo awm theite leh food safety chungchangte uluk taka ngaihtuah chungin, sorkarin dan hnuaia mumal taka a kalpui a ṭul bawk ang.