Kum 2020 a her liam dâwn ta

Vawiin, December 31 hi kum 2020-a ni hnuhnung ber a ni. Kumin hi Covid-19 avangin khawvelin he kum hi a ṭha lo zawngin a hre reng tawh dâwn a, chutih rualin mimal ṭhahnem tak tán erawh kawng ṭam takin kum ṭha a ni ngei ang.

Kum 2020 zet zawng kum danglam tak a ni a, kum khata ni tam zawk chu hripui lêng avangin inkharkhip leh inkhuahkhirhin kan hmang a tih theih ang. Khawvel pumah mi maktadûai 1.75 chuangin he hripui hi an thih phah tawh a, India ramah pawh nuai 14 chuangin nunna an chân a ni. He hri hian mihring nunna a la mai a ni lo a, mi tam tak eizawnna a tlachhia a, chhungkaw tam takin ei leh in tur an tlachham a, harsatna nasa tak a thlen a ni.

Mizoramah pawh he hri hi nasa takin kan tuar a, thihpui tam lo mah se a state pumin kan tuar a tih theih ang. Mizoram sorkar pawhin hmasawnna hna tam tak an thawh theih loh phah a, sum hmanna tura duan lawk ni loah pawisa tam tak a luang ral. He hripui hian hun leh tha a heh em em mai bakah khawtlang nun a tibuai a, zirna a khaihlak a, kohhran inkhawm pawh kalpui theih a ni lo.

A chhiatna leh harsatna lam ringawt thlir dâwn chuan kum 2020 hi kum chhia angin a sawi theih a, vanduai kum chu a ni ber mai. Chutihlaiin heti zatin nunna a  chân tawh chunga a dam chhuak zinga kan tel hi läwm nachang hria ila, eizawnna leh thil dangah harsatna kan tawk a nih pawhin hnathawk theia kan la dam a nih chuan a êng lam thlirin i bei zel ang.

Kum hlui ngaih leh lunglen hi a tak takah chuan hmasawnna kawnga min hruaitu a ni vak lo a, chuvangin hmalam pan turin insangmar ila, kum 2021 hmuak turin rilru i siam ang u khai.