Kawngpui chhe lutuk mawlh mai hi

PWD Minister-in July 18, 2025- ah Mamit district-a Tuidam leh Dárlâk inkar kawng, hun rei tak chhe lutuk tawh a hmunah a tlawh a; harsatna tihziaawm lailâwkna atan PWD-in cheng nuai 20 a pek tawh thu leh an thawm ṭhat dawn thu a sawi. PWD Minister-in a tlawh hian awmzia nei ngei teh se.

Fûr lai a ni a, kum dang ang bawkin kawng chhia kan buaipui nasa. A bik takin Mizoram mamawh tinrêng lak luhna kawngpui Kawnpui leh Sairang inkar chhe lutuk hi tunlaia kan buaipui ber a ni; Mizoram sorkarin a mualpho phah mek a, mipuiin nasa takin sorkar an dem phah mek.

Hmun danga kawng chhiate chu eng pawh lo ni se, Mizoram mamawh tinrêng lâk luhna Vairengte-Sairang inkar kawngpui chhia hi a pawi zual. Tunah pawh kawng chhiat lutuk vangin tuialhthei phurtute an tlân duh lo a, mipuiin harsatna an tâwk mek a ni.

Bungraw phur lirthei dangte pawh an tlân ṭha duh lo. Sumdawng ṭhenkhat chuan bungraw thlen dan ngaihtuahin, kumin hi kawng chhia vanga bungrua a thlen tlem ber ṭum ni hialin an sawi; hei hian lirthei tlân duh lo an tam tih a entir âwm e.

Kawnpui-Sairang inkar kawng chhia chungchangah hian sorkar leh kawng siamtute tan insawithiamna tur a awm theiin a lang. Mahse, tunah hian kawng a chhe lulai lutuk a, inpuh kual chi a ni tawh lo, khawmuang loa engti kawng pawha siam a ngai a ni.

Mizoram sorkar tan thil tih a harsa a ni thei a, tih theih nei lo erawh a ni lo. Mizoram chhung a ni miau a, Mizoram sorkarin a enkawl ni lo mah se, mawhphurhna a nei tho. Sorkar hian na hrêk hrâwkin hma han la teh se.

Mizorama NH kawngpuite enkawltu NHIDCL hian Mizoram sorkar hotute hi an ngai pawimawh tâwk lo a ni thei. Chutiangte a nih chuan Mizoram sorkar hi na zawka a chêt a ngai tihna a ni ang. Kan kawngpui pawimawh ber heti tak maia chhiaa an dah hi Mizoram mipui zah lohna a tling.

Mipui pawhin NH kawng chhia hi state sorkarah bûrbun vek lo leh, sorkar sawiselna atan ringawt hmang loin, a taka kawng enkawltute hi na zawka an nawr a ṭul ta a ni.