Khawpui fai leh bawlhhlawh sâwngbâwl

Ministry of Housing and Urban Affairs buatsaih, India rama khawpui fai inelna Swachh Survekshan Award 2024-2025 chu tun hnai khan New Delhi-ah sem a ni a; Lunglei khawpuiin Mizorama khawpui zinga faina lama hma hun êng ber 'Promising Swachh Shehar Award' a dawng.

Swachh Survekshan Award-ah hian India rama khawpui zawng zawng telin, tehfung hrang hrang hmanga inel a ni. Kuminah hian award chi hrang 78 sem zinga pakhat chu Lunglei-in a dawng a; a hmain Swachh Survekshan Award paruk a lo dawng tawh bawk.

India ram pum huapa faina lawmman Lunglei khawpuiin a dawng thei hi a lawmawm. Sorkar hmalakna bakah, Lunglei Municipal Council, local council, pawl hrang hrang leh mipui ṭanrualna vang a nih ngei a rinawm a; an chhuanawm hle.

Khawpui fai teh dan hi khawlai leh kawngpui fai emaw, kawngpuia kala hmuh chin fai ringawt a ni lo a; bawnghlawh paih dan leh sâwngbâwl dan hi a pawimawh berte zinga mi a ni.

Bawlhhlawh sâwngbâwl dan ṭha aṭanga teh chuan Aizawl leh Mizorama khawpui dangte hi an la ṭha tâwk lo hle. Aizawl leh kan khawpui dangte hi khawlaia kala hmuh mai theihah chuan India rama khawpui faia an thlan tam tak ai chuan a fai zawk anga hmuh theih a ni. Mahse, bawlhhlawh paih leh sâwngbâwl danah kan khawpuite hi an la hniam avangin India rama tehnaah an sang thei lo ṭhin.

A lang laia fai ringawt a tâwk lo a, a lang lo lai zawng zawng fai tel a pawimawh bakah, bawlhhlawh paih leh sâwngbâwl dan a pawimawh hle tih hi mipuiin kan hriat a ngai. A bik takin bawlhhlawh thliar, paih leh sâwngbâwl chungchangah sorkar leh mipui kan ṭan lehzual a ṭul a; pheikhai rual taka ṭanho a pawimawh tak zet.

Mizorama khawpui zawng zawng hi India rama khawpui fai berte zinga an tel theih nan nasa taka ṭan lak a ngai. Lunglei khawpuiin kumina lawmman an dawn hi duh tawk mai loin, lawmman hlu lehzual dawng turin ṭan la sauh sauh zel se; khawpui dangte pawhin Lunglei khûm tumin ṭan han la sauh sauh teh se.