Dan bawhchhiate zilh leh hrem
Mizoram State Commission for Protection of Child Rights chuan youtuber pakhat lakah July 21, 2025 khan Aizawl Police Station-ah FIR an thehlut.
MSCPCR hian naupang pakhat harsatna tâwk nihna chhui chhuah theihna tur thil Youtube-ah tihchhuah a nih avangin YouTube channel neitu pali an ko a, chuta kal ve lo pakhat lakah FIR an thehlut a ni.
Naupang humhalhna leh venhimna lama MSCPCR-in hma an la hi a lawmawm a, an tih tur, a din chhan pawh a ni rêng a; hma an lak tawh dante a ṭha viau a ni thei a, an ṭan lehzual erawh a ṭul ang.
MSCPCR hian a hma pawhin social media-a thu leh thlalak thehdarh vangin mi koha zilhhau an nei tawh ṭhin. Social media hmanga naupang humhalhna dan bawhchhiate dan ang taka hrem erawh an la nei meuh loa sawi a ni.
Tun hnaia FIR an thehluhah pawh dan an tlawhchhan BNS Section 206 (Absconding to avoid service of summons or other proceeding) a ni a; naupang humhalhna dan bawhchhiat vanga dan anga hrem tumna lam ni loin, MSCPCR-in a koh ngai pawimawh loa kal loh vanga hremna tur lam a ni.
Naupang humhalhna leh venhimna dan bawhchhiate zilh hi a ṭha reng a, mahse, zilh ringawt hi a tâwk zo lo thei. Tun hma pawhin dan bawhchhiate an lo zilh tawh ṭhin a, mahse, dan bawhchhiatna a la awm zel tho. Zilh ringawt hian mipuiah nghawng a nei tâwk lo a ni thei a; zilh ringawt loin, dan bawhchhiat ang taka hrem ni se, nghawng a nei lian zawkin a rinawm.
Social media-ah thu dik lo thehdarh a tamzia kan hria. MSCPCR chauh ni loin, state sorkara thuneitute pawh social media-a thu dik lo thehdarh chungchangah dan anga hma an lak chak lehzual a ṭul. Dan loa thil tih a awm leh awm loh ngun lehzual vil a ṭul a, cyber crime lam tihchangtlun a, thawktu dah belh zel a ngai ang.
Youtube leh social media-a thu leh hla leh thlalak thehdarh ṭhinte an fimkhur lehzual a ṭul tak meuh. Pawisa lak luh duh luat vanga thu dik lo thehdarh lo tur te, dan bawhchhiaa thil ti lo tur leh, Mizo nunphunga mawi lo khawpa thil ti lo turtea fimkhur a ṭul a ni.