Politics khelh danah inenfiah a ṭul

Lunglei North bialtu MLA chungchanga mi pakhat thusawi (audio) social media-a darh chungchangah Lunglei Police Station-ah FIR a lut a, police-te'n bawhzuiin, inhnamhnawiha puh mi pathum an man tawh.

Police-a FIR a luh chhan hi, dik lo taka MLA chungchang sawi leh sawina audio a darh vang a ni. Hemi chungchangah hian mipui náwlpui chuan thu dik kan hre lo. Police-in an chhui chhuak turah ngai ila, court lamin dik takin ro an rêl bawk ang a; thu dik chu kan la hre thei ang.

Thil thleng chungchangah hian thu dik lang chhuak ngei se, thil dik lo ti emaw, dâwt hmanga MLA tihhmingchhiatna emaw a awm a nih chuan, thil dik lo titu chu hrem ngei ni se. Chutiang tur chuan police leh court lamin theihtawp han chhuah teh se.

Politics hi ram leh hnam rawngbawlna pawimawh, ram kaihhruaina kawng a nih laiin, mi tam tak chuan Mizorama party politics an khelh dan hi chu a tenawm niin an ngai a, telna tlakah an ngai lo. Mi tam takin tuna politics an khelh dan hi chu a tenawm rêng a; inenfiah a ngai tak zet.

India ramah kan awm a, India ram hmun danga politics an khelh dan hi lak luh loh theih loh a nihna lai a awm. Vai ho politics khelh dan kan la lut a nih pawhin, an tih dan ṭhate entawnin ti ve ila, an tih dan ṭha lote erawh chu tih ve kher tum loh a ṭha.

Mizote hi tun hma aṭang tawhin ze ṭha tak nei kan ni a, chungte chu Zo nun ze mawi kan ti a, tun thlengin a chhuan pawh kan chhuang a ni. Chutih laiin, party mi leh sa tam takin politics an khelh dan te, dâwt leh thu dik tluantling lo hmanga party dang an chirhtheh dante hi chu kan Zo nun ze mawite leh Kristianna nen inpersan tak a ni.

Party politics kan kalpui dan tam tak hi Mizo nunphung ṭha te, Zo nun ze mawi kan tihte tichhetu a ni fo. Kan politician-te leh political party mite hian politics hi ram rawngbawlna a nih thu sawi ringawt loin, a taka an lantir a ṭul tak zet a ni.