Bank hnathawktute leh mipui

Tun hnaiah sorkar laipuiin India tangka Rs 500 leh Rs 1000 note a tithi a, December 30 thleng bank-ah thleng theih a ni. Pawisa thih hnuah a lêt tam takin bank an lûn a, pawisa dah lut duh leh thleng duhte thui tak tak an intlar.

Thuneitu lam pawhin mipui-te harsatna tawh hi an hria a, bank-te pawh Inrinni leh Pathiannia inhawng turin thupek an chhuah a, heti chung pawh hian mipui ṭhahnem tak an la intlar ngei ang. Tun ang hun hi chu thleng zen zen lo a ni a, a thleng nawn leh tawh kher lo mai thei a, chuvangin tun hun bikah hi chuan bank lam pawhin
ṭhahnemngai takin mipui tan theihtawp chhuah se a ṭha hle.

Tun hma chuan Mizorama bank hnathawktu zingah biak hrehawm leh dawr nuam lo fâl an awm ṭhin. Hengte avang hian mipui pawh an vui a, a ṭhen an thinur a, kan pawisa peipunna hmuna hnathawktute zawkin a dawrtu chinchang hre lo zawkte an vin lêt a, mipui an tivui fo. Hetihlai hian hetiang tih ching bank hnathawktu hi an awm a nih pawhin mi tlem te chauh an ni tawh ang a, heng mite avanga bank hnathawktu zawng zawng dawr nuam lo anga sawite hi a fuh chiah lo.

Engpawhnise tunah hian ram pumah hun danglam bik kan thleng a, he hunah hian Mizoram bank hnathawkte hian ṭum dang zawng aiin mipui tana hnathawktu an ni tih hre chiang se, mipui tana dawr nuam thei ang berin awm se a ṭha hle. Banking chinchang hre miah lo, pawisa chân hlauh vanga bangbo tak taka bank pantute tan hian ṭanpuina dawh-kan (help desk) siam theih ni se a ṭha khawp mai. Miin chinchang a hriat loh poh leh ṭanpui a ngai zual tihna a ni a, Mizoram bank-a hnathawktute hian state dangte entawntlakin hna thawk se, he hun danglam bik kan tawnah hian mipui fak zui tur khawpin ṭang se, mipuite pawhin a theihna zawnah bank hnathawktute i ṭawiawm ang u.