Mi puih duhtu Mizo

India sorkar laipuiin Rs 500 leh Rs 1000 note a tihthih avangin India ram pum a buai a, Mizoramah pawh mi tam takin harsatna an nei. Hetiang boruakah hian India ram hmun dangte ang em emin Mizoramah mipui an buai lo a, hei hi Mizo mipuiin midangte puih duhna rilru an la put len vang niin a lang.

Tun hnaiah Mizo-te kan ṭhat tawk lohna, kan sorkarin duhthu a sam lohna, kan rinawm tawh lohzia, sum kan duhzia leh Zonun ze mawi kan tih mai a tlakchhiat tawhziate sawi ṭhin a ni. Hengte hi a dikna chin awm mah se, tun hnaia pawisa thih boruakah hian midangte ṭanpui duhtu Mizo ṭhahnem tak an la awm a ni tih a takin a lang.

Sumdawngte zingah pawh midangte tana awlsamna siam tum, mipui nawlpui tan pawisa thi hi bank-ah thleng a buaithlak a ni tih hriaa an pawisa lo dawn sak duhtu an awm a, a tira hlauthawng deuhte pawhin midangte tih hriain mipui tana remchang an siamsak a, a lawmawm hle.

Sumdawngte hian vawi tam dem an hlawh a, mipui tana an inhawn loh thu leh an duhamzia sawi ṭhin ni mah se, tun hnaia an chet danah an fakawm hle. Bank-a hnathawktute pawhin ṭan an la a, bank dawrtu lamte vui-vaina thu pawh hriat tur a tlem a, midangte puih inhuam-in bank-ah hna an thawk a, mipui harsatna tam tak an sut kian sak a, an fakawm takzet a ni.

Pawisa tihthih hi thil thleng zen zen lo a ni a, he kan hun tawn mekah hian Mizote hian Mizo nun mawi hi lan chhuahtir zel ila, a pui theitu dinhmuna dingte’n a hre lo leh harsa zawkte ṭanpui dan ngaihtuah zel ila, Mizoram hi state dangte aia buai lo leh felfai zawka kan awm theihna tur chu kan zavaia ṭhat kan inchhuah tawn hi a ni ngei ang.