Aizawl bazar pui ven a ngai

Chhinga Veng, Dawrpui, Electric Veng, Saron Veng leh Zarkawt branch YMA-te chuan, Aizawl bazar pui leh a chhehvela kumin October 4 leh November 11 inkara ruihhlo an mante tun hnai khan an halral a, heng thilte hi tualchhunga an hralh ṭhinna ang chuan, Rs. 4,94,790 hû a ni.

Aizawl hmun pawimawha awm YMA branch hrang hrang intel khawmin khawtlang siamṭhatna tura ṭan an lakna hi a fakawm hle mai a, tha thlah loa an ṭan chhunzawm zel a ngai. Heng branch-te hian Aizawl bazar pui ber leh a chhehvel an veng ṭhin a, ruihhlo an man tam dan aṭanga teh ringawt pawh hian Aizawl hmun lailiah hian ruihhlo a zalen hle tih phat rual a ni lo.

Kan khawpuia hmun laili hi tun hma aṭang tawhin hmun
ṭawp leh sual tihna remchangah hman a ni ṭhin a, a pawi khawp mai. Tun hnaiah Zodin leh Treasury Square vel pawh YMA branch hrang hrang ṭangkawpin an veng a, tunah bazar pui ven a ngai leh ta bawk. Heng hmunte hi tlawmngaia ven a nih loh chuan police lam hi an indaih thei mang si lo a, kan hmun pawimawh leh laili hi ruihhlo tiho leh a zuarte hmunpuiah a chhuak mai ang tih hlauhawm khawp a ni.

Krismas a hnai a, mipui nawlpuiin he bazar pui hi an pan khawm leh dawn. Hetih hunah hian thil bo a tam duh em em a, hei hi ruihhlo zuarte pawhin remchangah hmangin ruihhlo an lo thehdarh ve bawk ṭhin. Hengte veng tur hian sorkar mi rawihte awm bawk ṭhin mah se an tha a chak tawk lo a, tlawm-ngaia thawk chhuak YMA duty-te bawk hi an thawh hlawk leh ang.

Mizorama kan bazar pui leh a chhehvel a lo thianghlim theihna tura ṭan latu YMA-te an fakawm a, an thil ṭha tih hi chhunzawm zel se, tha thlah loin ṭang zel rawh se.