Zu vanga harsatna leh thihna

Excise & Narcotics department-in report an chhinchhian danin, kum 2024 chhung khan Mizoramah zu vangin mi 71 an thi a, kumin 2025-ah June 30 thlengin mi 49 an thi. Kum khat leh a chanve chhunga zu vanga thi mi 120 zinga 100 chu mipa an ni.

Kum 2024 chhung khan Mizoramah ruihhlo vanga thi mi 67 an awmin, mipa 58 leh hmeichhia pakua an ni a; kuminah June 30 thlengin mi 36 an thi tawh bawk. Ruihhlo tih hi narcotic drug a ni a, zu a tel lo.

Nikum chhungin ruihhlo vangin mi 67 an thih laiin, zu vanga thi mi 71 an awm a, zu vanga thi mi paliin an tam zawk. Kumin kum chanve chhungah pawh ruihhlo vanga thi aiin zu vanga thi mi 13-in an tam zawk a ni.

Zu vanga thi tih hi hmun hrang hranga YMA-te aṭanga report dawn a ni a; zu vanga thi tia report rem chiah lo, zu kaihhnawiha ngaih theih tho si tam tak a awm theih thu Excise & Narciotics hotute chuan an sawi.

Tunlaiin Mizoramah ruihhlo a hluar a, sorkar, kohhran, pawl hrang hrang leh mipui náwlpuiin kan ngaihven em em; a ṭul reng a. Ruihhlo (narcotic drug) kan buaipui em em lai hian, zu leh zu vanga harsatna lam hi mipui náwlpui ang chuan kan ngaihsak lo deuh niin a lang.

January 2024 aṭanga June 30, 2025 thlenga zu vanga thi zat leh ruihhlo vanga thi zat ngaihtuahin, zu leh zu vanga harsatna, buaina leh thihna thleng lam hi kan ngaihthah loh a ṭul tih a lang chiang.

Ruihhlo kan ngaihven em em lai hian, ruihhlo ang thoin zu hian min rún reng a, ruihhlo kan tihte aia nasa zawkin min rún a tih theih. Chuvangin, zu dona lam leh zu vanga buaina leh harsatna lam hi ngaihthah loa kan ngaihven a ṭul a, ngaihthah chi a ni lo.

Zu chungchang sawi chuan zu khap thu hi sawi loh theih a ni lo. Zu khap leh khap loh hian ṭhatna leh ṭhat lohna a nei ve ve ang. Zu khap chungchangah hi ngun taka ngaihtuah a, a nghawng ṭha leh ṭha lote zir chian a, ram pumpui tana ṭha zawk turah chuan huaisen taka thutlukna siam a ngai a ni.