Chi bil rilru put loh a pawimawh

Pawl panga telna NGO Coordination Committee chuan July 23, 2025-a thuchhuah an siamah, Mizorama awm mek Zo hnahthlak ráltlânte chu chi bil rilru pu lo tur leh inpumkhatna tichhe thei zawnga thil ti lo turin an hriattir.

NGOCC hian Myanmar leh Manipur-a tualchhung buainain a nghawng kal zelah Mizoram chhunga chi bil rilru rawngkai hriat tur a awm chu pawi an tih thu an a ni.

Chi bil anga inhlawm khawma pawl din hian thil eng emawah chuan ṭhatna leh ṭangkaina a nei ngei ang a; mahse, Mizorama mipui náwlpui ngaihtuahin, thil ṭha lo zawk a nih a rinawm.

Ṭhenawm ramah Zo hnahthlak zinga chi bil pawl din vanga harsatna leh buaina thleng a awm tawh ṭhin a, tun hnai lawkah pawh a awm a, ralthuam leka inbeihna hial a thleng a; a pawi em em a ni.

Mizoramah chuan chi bil pawl din leh chi bila hmalaknate hi tih loh a ṭha a, inpumkhatna leh inlungrualna tichhetu a la ni thei. A kal zel phei chuan ṭhenawm ram ang maiin, innghirnghona, inhmelmâkna leh inbeihna thlentu a la ni thei a; chuvangin, tun aṭanga fimkhur a, chi bil rilruin a hrin chhuah theih hrang hrangte hmeh mih zung zunga a ngai.

Mizoramah hnam péng hrang hrang kan awm a, mahse, mahni hnam bil sawi loin, Mizo angin lungrual takin kan chengho a; hei hi kan vawn nun zel a pawimawh. Zo hnahthlakte inlungrual taka chênhona ram a nih avang hian tuna ṭhenawm ram aṭanga himna tura Mizorama awm mekte hian chi bil rilru an pu tur a ni lo a, Zo hnamte inunauna leh inpumkhatna tichhe thei zawngin hma an la tur a ni lo.

NGOCC-in chi bil rilru pu lo tur leh Zo hnam inpumkhatna tichhe zawnga hma la lo tura hriattirna an chhuah hi a lawmawm; Mizo hnam kal zelna atana ṭha tur a ni. Zo inpumkhatna atan theihtawp chhuah zel se, Mizo mipuiin kan thláwp tlat tur a ni ang.

Ṭhenawm ram aṭanga Mizorama rawn ráltlân mekte'n NGOCC thuchhuak hi an ngai pawimawhin an zawm tur a ni a; chi bil inla hrang zawng leh inti hrang zawngin hma an lak loh a ṭha e.