Thlai leh thei hralhna ngaihtuah

Kum eng emaw zat zîkhlûm lo ching nasa tawh Samtlang khuain tunlaiin zîkhlûm ṭhahnem tak an thar a, quintal 1,500 - 2,000 vel an hralh tawh laiin, an hralh ṭhat theih loh avangin qtl. 1,000 vel a ṭawih chhe tawh.

Samthang khua hian kuminah zîkhlûm qtl. 6,500 vel thar an inbeisei a, qtl. 1,500 - 2,000 vel chiah an la hralh a, thar an beisei zatve pawh a la tling lo.

Samthang khuain an zikhlum tharte hralhna tur an hre lo hi an khawngaihthlak hle mai a, hah taka hna an thawh rah a tél ṭha thei lo hi a zialo hle a ni. Chutih laiin, an mangangin an ngen anga Aizawla YMA branch sawmin zikhlum eng emaw zat an zawrhsak erawh a lawmawm hle thung.

Samthang khaw mipuiin zikhlum an tharte an hralh theih a, an thawh phû tâwk hlâwkna an hmuh theih nan engtia hmalak chi nge ni ang tih hriatthiam a har a; sorkar aṭangin a ni emaw, pawl emaw aṭanga pui theih dan awm se a duhawm hle.

Mizoramah thlai chìn bik neia tam tham tak thar ṭhin khua an awm nual mai. Zîkhlûm, tomato, lakuihthei, sapthei leh thlai/thei dang dang thar tam bik khua an awm nual a ni.

Khaw eng emaw zatin thlai leh thei an tharte hi Mizoram mipui mamawh phuhru khawp a ni lo. Chutih laiin, a man ṭha pangngai taka hralh zawhna khawp Mizoramah an hmu lo fo tlat si. Hei tak hi chinfel ngai niin a lang.

Mizorama thlai leh thei tharte ṭha taka an hralh zawh theihna tura awmze nei taka hma la theitu chu sorkar a ni. Sorkar hian thlai leh thei chin tur a ngaihtuahpui rualin, a hralhna turah ruahmanna ṭha tak a siam a ṭul a, kawng a zawnpui a ngai a ni.

Mizorama thar chhuahte hralhna an hriat loh ṭhin chhan chu, phai lam aṭanga rawn lut vang a ni ṭhin; phai aṭanga rawn lutte a man a tlawm zawk ṭhin si. Heng chungchangah pawh hian Mizorama kut hnathawktute'n an thawhrim phu tâwk hlâwkna an neih theih nan sorkarin ṭan a lakpui a ngai a ni. Kut hnathawktute pawh a man tihtlawm theih dan an ngaihtuah a ṭul bawk ang.