ZPM MLA-te leh kawng siam vil

ZPM Legislature Party member (MLA)-te July 26, 2025 zana ṭhukhawm chuan Kawnpui-Sairang kawng chhe lutuk thawm ṭhat mek chak lehzuala hna thawh a nih theih nan chu ni tin minister/MLA pahnih talin vil an rêl a; a tuk July 27 aṭangin an vil ṭan nghal.

Kawnpui-Sairang kawng hi nikum 2024 fûr lai khan nasa takin, lirthei tlân hleih theih loh khawpin a lo chhe tawh a, lirthei pawl anga tlân duh lo pawh an awm nual a ni. Nikumah nasa takin kawngpui a chhia a, siam a nih loh chuan kumin fûrah nikum aiin a chhe lehzual ang tih rin lâwk theih a ni. Kawng siam hun lai, ruahtui hul laia siam a nih miau loh avangin nikum aiin kuminah a chhe ta rêng bawk.

Tuna kawngpui chhe lutuk lai, Kawnpui-Sairang inkar hi Mizoram sorkar enkawl reng a nia sawi a ni a; state sorkarin July 7, 2025 khan NHIDCL hnenah a hlan a ni. Kumin July 7 hma zawng kha chuan Mizoram sorkar enkawl a ni tihna a ni a, kawng a chhiat a ṭhatah state sorkarin mawh a phur tihna a ni bawk. Mi ṭhenkhatin NHIDCL kâwk ṭhin mah se, state sorkar mawh a lian zawk a tih theih àwm e.

Nikumah nasa taka a chhiat tawh hnua kumin fûrah nasa lehzuala Kawnpui-Sairang kawng a chhiat chungchangah hian state sorkar hian a tih tur a ni tâwk lo niin a ngaih theih. Kawngpui siam dan pangngaia siam theih a nih rih loh pawhin, lirthei tlân theih pangngai tal leh, tlân hlauhawm khawpa a awm loh nan tala awmtir reng turin state sorkar hian a tih tur a ti tâwk lo niin a lang bawk.

Mizoram mamawh tinrêng lak luhna kawngpui pawimawh tak chhe lutuk thawm ṭhat hna a chak zawk theihna tura rorel lai ZPM MLA-te'n ni tin a inchhâwka a hmuna vil an rêl hi a lawmawm. Chutih rual chuan, mi tam tak chuan an che tlai lutukah leh, ram mipuiin nasa taka an tawrh hnua che chhuak ve chauhah an ngaiin a rinawm.

Engpawhnise, ZPM MLA-te hi an che chhuak tlai deuh a nih pawhin, chêt chhuah loh ai chuan a ṭha hrim hrim a, awmzia a neih ngei pawh ring ila; kawng chhe lutuk thawm ṭhat hna thawh mekin a chak phah ngei beisei phawt mai ila a ṭha àwm e.